Iki gikorwa cyatangirijwe ahakorerwa ubugenzuzi bw'ibinyabiziga (Contrôle technique) mu Mujyi wa Kigali kuri uyu wa 29 Nyakanga, kizibandwaho muri iki cyumweru cya gatatu cy’Ukwezi kwahariwe ibikorwa bya Polisi.
Umuyobozi w'ishami rya Polisi rishinzwe umutekano wo mu muhanda CP Rafiki Mujiji, yabwiye itangazamakuru ko ‘Hari imashini zitimukanwa zikoresherezwa ahakorerwa ubugenzuzi bw’imodoka n’izimukanwa abapolisi bajyanye mu muhanda’.
Ati “Iki cyumweru tuzaba turwanya ibintu byose bishobora guhungabanya umwuka cyangwa ikirere cyacu. Twatangiye gupima imyuka ihumanya ikirere, bisanzwe bikorerwa aha [Contrôle technique] ariko hari umwihariko hari imashini zigendanwa bajyanye hirya no hino mu gihugu.”
Yavuze ko ubusanzwe iyo gahunda yo gupima ubuziranenge bw'ibinyabiziga isanzwe ibaho rimwe mu mezi atandatu ariko ababifite ntibakwiriye kuyategereza.
Ati “Usibye gupima bimwe bitera impanuka dusanzwe dukora, tunapima ibishobora kwangiza ubuzima bw'abanyarwanda…Iyo dusanze ibipimo by'iyo myuka ihumanya biri hejuru, nyirayo ntahabwa urupapuro rwerekana ko imodoka ye yujuje ubuziranenge, turamubwira tuti genda wongere ugenzure moteri yawe.”
CP Mujiji yavuze ko muri iki cyumweru hari abapolisi bari mu mihanda bafite imshini zipima uwo mwotsi ku buryo umushoferi ashobora kubacaho agahagarara cyangwa bakamuhagarika bakamupimira.
Ati “Iyo urebye ibinyabiziga binyura hano (Contrôle technique), ibitambuka nta kibazo biri hejuru ya 75%. Abantu 25% baje ahangaha nibo tugira inama bagasubiramo kureba ibyo bahindura.”
Yakomeje agira ati “Uriya mwuka ntabwo wangiza abari ku muhanda gusa nawe utwaye ikinyabiziga bikugiraho ingaruka n'abo utwaye.”
Manirakiza Samuel wari waje gupimisha imodoka yavuze ko icyo gikorwa gishimishije kuko bacyegereje n’abari hirya no hino mu gihugu ku buntu.
Ati “Igishimishije kurushaho ni uko batubwiye ko abapolisi bafite izo mashini ushobora kubacaho mu muhanda, ugahagara bakagupimira nta kiguzi, urumva ko ari ibintu byiza cyane kuko hari n’ubwo uba utwaye utaziko umwuka usohoka ari mubi.”
Ubushakashatsi bwamuritswe n’Ikigo cy’Igihugu cyo kubungabunga Ibidukikije (REMA) mu 2017 bwagaragaje ko ibiza ku isonga mu guhumanya umwuka uhumekwa mu Rwanda harimo umwotsi w’imodoka, imyotsi y’amakara n’inkwi n’ibindi.
Bwanagaragaje ko 95,2% y’imodoka ziri mu Rwanda zimaze imyaka irenga 10 zikozwe; 56,6 % zakozwe mbere yo mu 1999 naho 77,2% zakozwe mbere ya 2000.
Minisiteri y’Ubuzima mu Rwanda igaragaza ko buri mwaka mu mavuriro hakirwa miliyoni eshatu z’abivuza indwara z’ubuhumekero barimo 13% bazitewe n’ihumana ry’ikirere.
Amafoto: Gift Munyarugerero
Ibitekerezo 0