Ubushinjacyaha, nyuma yo gushyikiriza urukiko idosiye ya Col Tom Byabagamba, Rtd. Brig. Gen. Frank Rusagara na Rtd. Sgt Kabayiza, bwasabye uburenganzira bwo gucukumbura ibimenyetso bishya mu butumwa Rusagara yagiye ahererekanya n’abandi, aho buvuga ko bwatahuye emails yandikiraga abantu batandukanye barimo na Byabagamba ubwe, asebya u Rwanda n’Umukuru w’Igihugu.

Muri iyo baruwa yo ku wa 02 Nzeri 2014 itanga uburenganzira bwo gukurikirana itumanaho rya Rusagara, nomero ya telefoni ivugwamo ko ari yo ya Rusagara yahakanye ko yigeze kuyikoresha, ahubwo avuga ko ubwo burenganzira bw’ubushinjacyaha bufite inenge.

Ku byavuye muri iryo genzura, Brig. Gen. Rusagara ahubwo yibajije uburyo habonetse amakuru kuri numero itari yo.

Major Bernard Hategekimana uyoboye iburanisha yabajije Rusagara n’umwunganizi we niba mu bimenyetso byashyikirijwe urukiko harimo ibifite aho bihurira n’iyo nomero, Me Buhuru asubiza ko kuba mu ibaruwa yemeza iryo cukumbura harimo inenge bikwiye gutesha agaciro n’ibindi bimenyetso.

Ubushinjacyaha bwavuze ko ubutumwa bwa e-mails bwashyikirijwe urukiko burimo ibimenyetso bushingiraho burega Rusagara ntaho buhurira na numero ya telefoni bita ko itari yo.

Umushinjacyaha ati “ibimenyetso bya telefoni bita ko atari iyabo ntacyo bakwiye kuba babyisobanuraho. Ariko se na e-mails si izabo?”

Colonel Tom Byabagamba ugarukwaho mu bo Rusagara yoherereje izo e-mails yavuze ko Ubushinjacyaha bwagiye ku mugaba w’ingabo busaba ko yemeza ko buperereza kuri iyo numero ya telefoni“akeka ko azi nyirayo n’ubwo atari imbere y’urukiko kugira ngo amuvuge,” bityo ngo ibijyana na zo ntibikwiriye kwitirirwa abandi.

Me Buhuru wunganira Rusagara yavuze ko urukiko rukwiye gusuzuma ingaruka bishobora kugira, kuko hanabayeho kwinjira mu buzima bwite bw’umuntu.

Igihe cyo gutanga ibimentso bishya cyateje impaka

Ubushinjacyaha bwashyikirije Urukiko rwa gisirikare idosiye y’urubanza rwa Col Tom Byabagamba, Rtd. Brig. Gen. Frank Rusagara na Rtd. Sgt Kabayiza ku wa 29 Ukwakira 2014.

Uburenganzira bwo gucukumbura mu butumwa bw’aba baregwa ngo haboneke ibimenyetso by’inyongera bwatanzwe ku wa 02 Nzeli 2014, ibyo bimenyetso bishyikirizwa urukiko ku wa 20 Mutarama 2015, iburanisha ritaratangira.

Me Valery yavuze ko kuba Ubushinjacyaha bwaragiye gushaka ibimenyetso bishya nyuma yo gushyikiriza idosiye urukiko binyuranyije n’amategeko.

Me Buhuru yasomye mu itegeko agaragaza ko urukiko rubyibwirije cyangwa rubisabwe n’ababuranyi ari rwo rufite ububasha bwo gutegeka gutanga ibindi bimenyetso.

Ubushinjacyaha bwo bwavuze ko nta tegeko ribukumira gutanga ibimenyetso bishya mu ikurikiranacyaha, mu rwego rwo gufasha gushakisha ukuri.

Urukiko rwasabye umwanya ngo rwiherere rubifateho umwanzuro, maze nyuma y’igihe kigera ku isaha, rwanzura ko mu ngingo z’amategeko nk’iya 88 igena iburanishwa ry’imanza nk’izi yemera ko urukiko rwakira kandi rugasuzuma ibimenyetso by’ababuranyi bigamije guhamya imvugo zabo.

Gusa, mu ibaruwa y’Ubushinjacyaha ku rwego rw’igihugu yashyizweho umukono n’Umushinjacyaha ku rwego rw’igihugu, Bonaventure Ruberwa, yo ku wa 2 Nzeli 2014, mu gika cya Gatatu n’icya Kane ntibisobanutse, bikaba bikenewe gutangwaho ibisobanuro n’uwabyanditse.

Ibyo bika ni byo bigaragaramo numero za telefoni za Col. Tom Byabagamba na Rusagara bombi bita ko atari izabo.

Urubanza rukaba rwasubitswe kugira ngo hazabanze hatangwe ibisobanuro ku byo urukiko rwita ko ‘bidasobanutse’, rukazasubukurwa kuwa 28 Ukuboza 2015.

[email protected]