Muri Kigali, hafi ya hose ntaho utasanga imitako igaragaza imyiteguro ya Noheli, Umunsi Mukuru abakirisitu bizihizaho ivuka rya Yezu Kirisitu. Amatara ya Noheli ndetse n’ibirugu, bishushanya uburyo uyu mucunguzi yavutse biri hose.

Mu nzira werekeza i Remera, ku muhanda hose hatatse amatara ya Noheli, naho mu masangano y’imihanda yaba mu Mujyi rwa gati n’ahazwi nko ku mazi hose hari imitako y’uyu munsi mukuru.

Ibi ntibiri muri Kigali gusa ahubwo biri n’ahandi mu nkengero z’igihugu, bigaragaza uburyo abanyarwanda bakereye kwizihiza izi mpera z’umwaka.

Umunsi wa Noheli urangwa n’ubusabane budasanzwe bw’ababyeyi n’abana. Ababyeyi barushaho guha abana serivisi nziza, bakabakorera agashya, babatembereza ahantu heza cyangwa babaha amafunguro adasanzwe, mu rwego rwo kubifuriza umunsi mwiza wa Noheli. Muri rusange, twavuga ko ari wo munsi wo kumurika urukundo rukomeye hagati y’umwana n’umubyeyi.

Ku ruhande rw’abana, usanga na bo babukereye kuri uwo munsi. Akenshi, abana ntibashishikazwa n’uko Noheli ibibutsa iby’ivuka ry’Umucunguzi Yezu Kirisitu, ahubwo usanga ari umunsi wo gushyikirizwa impano zitandukanye bahabwa n’ababyeyi, binyuze ku musaza witwa “Père Noël” cyangwa “Father Christmas” mu ruzungu. Uyu musaza Père Noel akundwa cyane n’abana, ariko nta n’umwe uramuca iryera.

Inshuti n’imiryango iba yakoranye, abari bamaze umwaka bari mu mirimo kure y’ingo zabo bagasubira ku ivuko. Ibi bigaragazwa n’uko mbere gato y’umunsi wa Noheli abantu baba ari uruvunganzoka mu ngendo.

IGIHE yanyarukiye muri Gare ya Nyabugogo kuri uyu wa Gatandatu tariki ya 23 Ukuboza 2017, isanga imirongo ari miremire y’abantu bategereje kubona uko bajya gusangira Noheli n’inshuti zabo.

Iyi ni Rond Point yo ku Kimuhurura imbere ya Kigali Convention Center. Nayo iratatse

Mu masangano y'umuhanda i Remera, hatatse imitako ya Noheli. Iyi mitako yashyizweho na Cogebanque

Amatara ku mihanda ari hose...

Aha ni mu nzira zerekeza i Remera...

Kuri RDB ahakirirwa abantu naho hateguye neza...

Ahazwi nko ku Mazi hateguwe na Coca-Cola

Ahazwi nko ku Mazi, hateguye ibiti bya Noheli...

Mu minsi mikuru, ibiciro biba byagabanyijwe

Ku nyubako zitandukanye hari imitako ya Noheli

Aha ni imbere ya Grand Pension Plaza naho hateguye neza mu kwizihiza Noheli

Kuri T2000 hari imitako yo kwifuriza abantu Noheli nziza

Aha ni ku nyubako ya KCT ahari gucururizwa impano za Noheli

Imitako y'abana iri gucuruzwa hose mu mujyi

Ubusanzwe mu gihe cy'iminsi mikuru abagenzi bagana mu Ntara baba ari benshi bigatuma rimwe na rimwe imodoka zibura