Uyu muhango ugiye kuba ku nshuro ya 13 uritabirwa n’Abanyarwanda n’abanyamahanga b’ibyamamare mu byiciro bitandukanye barimo abashoramari bakomeye ku isi nka Howard Buffett n’abandi barimo Lupita Nyong’o ukomoka muri Kenya, umaze kuba ikimenyabose muri filime zitandukanye nka 12 Years a Slave (2013) n’umukinnyi wa filime ukomoka muri Amerika witwa Sean Penn.

Kuri iyi nshuro, mu byerekezo byose bigana ahagiye kubera iki gikorwa harimbishijwe bikomeye bigaragaza agaciro iki gikorwa gifitiye ubukerarugendo bw’igihugu n’uruhare rwacyo mu kuzamura ubukungu bwacyo.

Mu mafoto abatumiwe bo mu byiciro bitandukanye barasusurutswa n’abahanzi baba abo mu Rwanda no hanze yarwo mu mbyino gakondo aho intore ziteguye kugaragaza umuco w’urwa Gasabo.

Ikigo cy’Igihugu cy’Iterambere (RDB) kivuga ko kuva umuhango wo Kwita Izina watangira mu 2005, ingagi 238 zimaze guhabwa amazina. U Rwanda rukomeje kuzamura umubare w’ingagi rufite, kuko nko mu 2010 rwari ufite imiryango 9 y’ingagi, ubu igeze kuri 20.