Abanyenganda bafite ibikorwa byabo mu gice cyahariwe inganda mu Mujyi wa Kigali (Special Economic Zone), bagaragarije Minisiteri y’Ubucuruzi n’Inganda ko bagifite ibibazo by’umuriro n’amazi bidahagije, bemererwa ko bigiye gukemuka.

Kuwa Kane tariki ya 31 Nyakanga, Kanimba Francois wongeye kugirirwa icyizere cyo kuyobora Minisiteri y’Ubucuruzi n’Inganda yasuye inganda zarangije kubakwa mu gice cyahariwe inganda, n’izikirimo kubakwa.

Ubwo yagendaga yinjira muri buri ruganda, ba nyirazo bishimiraga aho bashyizwe ndetse ko imirimo igenda, ariko bakagaragaza ko bagifite ibibazo birimo amazi n’amashanyarazi bidahagije, bikunze no kubura, hakaba no kuba nta murongo wa interineti wari wagezwa muri aka gace.

Minisitiri Kanimba ari kumwe n'Umuyobozi w'uruganda rukora imifariso

Minisitiri Kanimba yavuze ko ibi bibazo bagiye kubikemura, biciye mu biganiro.

Yagize ati “Twabasuye tureba ko nta bibazo bafite leta yabafasha gukemura. [...] ibibazo ntibikomeye cyane, inzego zibishinzwe iyo bicarana byagombye kuba byarakemutse, ni kimwe mu byo tugiye guhagurukira kugira ngo bikemuke burundu".

Uru rugendo rwasojwe hasurwa ahazubakwa ibikorwa by’ubucuruzi bitandukanye birimo ahazaparika amakamyo manini yajyaga ajya muri MAGERWA, yanatumaga imodoka ziba nyinshi mu mihanda yo mu Mujyi wa Kigali rwagati.

Iki kibanza kinini giherereye mu Murenge wa Masaka hafi y’ahari icyicaro gikuru cy’uruganda Inyange, kikazaba n’ububiko bw’aho abafite inganda muri Special Economic Zone bazajya bahunika banabika ibikorwa byabo.

Yasuye uruganda rukora inzugi

Minisitiri Kanimba asura uruganda rukora impapuro z'isuku

Minisitiri Kanimba asura uruganda rwa Afri-Tank

[email protected]