Ingengo y’imari iracyari imbogamizi ku gushyira mu bikorwa SDGs muri Afurika

Yanditswe na Twarabanye Venuste
Kuya 21 Ukwakira 2019 saa 07:50
Yasuwe :
0 0

Ishami rya Afurika yunze ubumwe, rishinzwe kugenzura ishyirwa mu bikorwa ry’intego z’iterambere mu bihugu bya Afurika (APRM), riratangaza ko ingengo y’imari yo kuzishyira mu bikorwa ikiri ikibazo gikomeye ku buryo no gukora ubushakashatsi ngo haboneke imibare yo gukoresha mu igenamigambi bikomereye ibihugu bya Afurika.

Mu nama y’iminsi ibiri iri kubera i Kigali, ibihugu bya Afurika birasangira ubunararibonye ku buryo bwo gushyira mu bikorwa intego z’iterambere rirambye 2030 (SDGs) n’uburyo buri gihugu kigenzura ubwacyo kigatanga raporo y’aho kigeze kizubahiriza.

Kugeza ubu ibihugu 35 nibyo byikoreye iryo genzura bitanga raporo, mu myaka ine ishize iyo gahunda ifashwe. Ibyo bihugu birimo Misiri na Sierra Leone byayikoze kabiri.

Gusa haratekerezwa ko iyi raporo yagirwa itegeko, kugira ngo hagerweho ‘Afurika twifuza’ mu 2063.

Ikibazo cy’ingengo y’imari cyagarajwe nk’imbogamizi ikomeye ituma ibihugu bigenda biguru ntege.

Afurika ifite icyuho kiri hagati ya miliyari $ 500 na tiriyari $ 1.2 cy’ingengo y’imari yakagombye kuba ikoreshwa mu gushyira mu bikorwa SDGs.

Umuyobozi wa APRM Prof. Eddy Maloka, yavuze ko muri rusange ibihugu bya Afurika byamaze gushyira intego z’iterambere muri gahunda zabyo ariko ikibazo cy’ubukungu gikomeje gutuma urugendo rwo kuzishyira mu bikorwa rurushaho gukomera.

Ati “Urabona ko ku mugabane hari icyerekezo, hari ingufu zashyizwe mu ntego z’iterambere, ariko haracyari icyuho kinini nko mu burezi n’izindi nzego. Ni ukuvuga ngo niba ikibazo atari inzego, dufite za Minisiteri, uburyo ibintu bikorwa, uruhare rw’abaturage n’ibindi. Ariko urugendo ruri imbere ntirworoshye, kubera ubukungu [amafaranga], kubera imibare ndetse no guhuza ibikorwa nabyo ni ikibazo.”

Kugira ngo izi ntego zishyirwe mu bikorwa, yibukije ko ibihugu bitagomba gukerensa imbaraga z’urubyiruko rugera kuri 20% [ruri hagati y’imyaka 15 na 24 y’amavuko] by’abaturage bose nk’uko imibare y’umuryango w’abibumbye yo mu 2015 ibyerekena.

Ku rundi ruhande ariko ashimira ibihugu bikomeza kwishakamo ibisubizo ngo bigire icyo bikora kuri izo ntego.

Ikibazo cy’imibare

Ikibazo cy’imibare no gukora ubushakashatsi cyagaragajwe nk’imbogamizi ikomeye kandi ari cyo cyagombye gushingirwaho mu igenamigambi rigamije gushyira mu bikorwa SDGs.

APRM yerekanye ko 40% by’intego zigomba kugerwaho arizo zifitiwe imibare n’ibihugu bitandukanye. Ibihugu 50% nibyo bifite ubushakashatsi bishobora kugenderaho bwakozwe mu myaka 20 ishize. 22% nibyo bifite ibiro bishinzwe ibarurishamibare.

Igisubizo kirambye

Umuyobozi mukuru w’ikigo gishinzwe iyubahirizwa ry’intego z’iterambere muri Afurika (SDGs Centre for Africa) gifite icyicaro mu Rwanda, Dr. Belay Begashaw yavuze ko kugira ngo ibibazo by’ubukungu bizitira iyubahirizwa ry’intego z’iterambere gikemuke ku bihugu bya Afurika ari uko hazabaho ikigega cyihariye cyo kuzitera inkunga.

Ati “Ikibazo cy’amafaranga ni ikibazo ahantu hose ariko birushaho iyo bigeze muri Afurika. Murabizi dukeneye gutera inkunga SDGs, dukeneye kuzamura ingengo y’imari, ibyo nibyo dusabwa. Ibyo rero ntiwabikora mu bushobozi dufite dukeneye kugira imvano z’amafaranga”.

Akomeza avuga ko igisubizo kirambye agisanga mu gushyiraho ikigega Nyafurika by’umwihariko ku buzima, uburezi n’umutekano mu biribwa, kuko ari ibibazo bikomeye cyane kuri Afurika.

Begashaw avuga ko iki gitekerezo ari ukukigeza ku bakuru b’ibihugu kugira ngo amafaranga akusanywe kandi acungwe neza kuko cyafasha kugera ku ntego z’uburezi n’umutekano w’ibiribwa ku Isi.

Ku rutonde rwa 2019 rwerekena uko ibihugu bikurikirana mu gushyira mu bikorwa intego z’iterambere, igihugu cya Mauritius kiza ku mwanya wa mbere n’amanota 66.16, Tunisie igakurikiraho n’amanota 66.12 ku mwanya wa gatatu hakaza Algeria ifite 65.77 naho Maroc yari iya mbere umwaka ushize iza ku mwanya wa kane n’amanota 64.37.

U Rwanda ni urwa 12 n’amanota 57.90 mu gihe ibihugu biri inyuma mu kubahiriza izo ntego ari Repubulika ya Centrafrique ya 51 ifite 36.70 na Sudan y’Epfo ya 52 ifite 29.19. Icyakora Libya na Sychelles nta manota byahawe kuri urwo rutonde.

Muri iyi nama y’iminsi ibiri iri kubera i Kigali, ibihugu bya Afurika birasangira ubunararibonye ku buryo bwo gushyira mu bikorwa intego z’iterambere rirambye
Khayar Oumar Defallah asanga nta kwibagirwa imbaraga z'urubyiruko
Tshediso Matona ushinzwe igenamigambi muri Afurika y’Epfo asanga irindi banga ari ugushyira ibigo bitandukanye birimo abikorera na za Kaminuza mu ishyirwa mu bikorwa ry’intego z’iterambere muri Afurika
Umuyobozi mukuru w’ikigo gishinzwe iyubahirizwa ry’intego z’iterambere muri Afurika gifite icyicaro mu Rwanda, Dr. Belay Begashaw yavuze ko hakwiye kujyaho ikigega cyihariye
Umuyobozi wa APRM Prof. Eddy Maloka (uhereye Ibumoso) Umuyobozi mukuru w’ikigo gishinzwe iyubahirizwa ry’intego z’iterambere muri Afurika Dr. Belay Begashaw na Khayar Oumar Defallah
Umuyobozi wungirije w’inama y’abaminisitiri muri Niger, Yacouba Ousseini Hadizatou yatangaje ko mu gihugu cye bari kugerageza gushyiramo imbaraga

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza