Muri uyu mushinga w’itegeko MINISPOC iteganya ko abayobozi mu nzego z’ibanze bazahabwa ububasha bwo gushyiraho urwibutso rumwe rw’icyitegererezo muri buri karere. Hakazaba hari amateka yaranze Jenoside muri ako karere ndetse n’amateka y’abahashyinguwe.

Inzibutso zose zitari ku rwego rw’igihugu, zidafite amateka yihariye cyangwa zitari ku rwego mpuzamahanga ni zo zizahurizwa mu rwibutso rw’akarere. Ibi byatumye abadepite bibaza niba hazabaho urwibutso rumwe mu karere.

Minisitiri Uwacu Julienne yabamaze impungenge avuga ko bitaba ikibazo, kuko bishoboka ko mu karere habamo inzibutso nyinshi zashyizwe ku rwego rw’akarere dore ko izizaba zubatse neza zitazakorwaho ahubwo zizahabwa akarere ngo kaziteho.

Mu ngingo ya 16 y’uyu mushinga w’itegeko hateganyijwemo uko imibiri y’abazize Jenoside yakorewe Abatutsi muri Mata 1994 ishyinguye mu marimbi cyangwa mu ngo, yakongera igashyingurwa mu cyubahiro mu rwibutso rw’akarere, bikozwe n’imiryango yabo cyangwa n’akarere.

Depite Mukakanyamugenge yagaragaje impungenge zo kuba abaturage bazajya bava mu Mirenge batuyemo bakajya kwibukira ahubatse urwibutso rw’icyitegererezo, ngo ibi bishobora kuzabangamira abibuka ababo, bitewe n’uko bashobora kuzaba batuye kure y’ahubatse urwo rwibutso.

Yagize ati’’ Bigomba kugaragazwa neza mu itegeko ko inzibutso zimeze neza zitagomba kwimurwa.’’

Depite Byabarumwanzi François, ukuriye Komisiyo y’ubumwe, uburenganzira bwa muntu no kurwanya Jenoside yavuze ko aho kugira ngo inzibutso ziriho zisenywe ahubwo zasanwa, abazishinzwe bagasabwa kuzitaho ku buryo zigomba kuba zujuje ibisabwa.

Iki gitekerezo agihuriraho na Charles Habonimana ukuriye umuryango w’abahoze ari abanyeshuri muri Kaminuza n’amashuri yisumbuye (GAERG) wavuze ko hari hakwiye gushorwa imari mu gusana no kwita ku nzibutso zihari.

Umunyamabanga nshingwabikorwa wa Komisiyo y’igihugu yo kurwanya Jenoside Dr Jean Damascene Bizimana yabwiye abadepite ko gushyiraho urwibutso rw’akarere bizafasha mu kuzicunga no kuzitaho kuko akarere gafite ubushobozi bwo gufata ibyemezo no gutanga amafaranga yo kurwitaho.

Minisitiri Uwacu Julienne