Ingoro ndangamateka y’urugamba rwo guhagarika Jenoside imaze gusurwa n’abasaga ibihumbi 196

Yanditswe na Evariste Nsengimana
Kuya 8 Ukwakira 2019 saa 06:22
Yasuwe :
0 0

Inteko Ishinga Amategeko y’u Rwanda ivuga ko yishimira kuba Ingoro ndangamateka y’urugamba rwo guhagarika jenoside yakorewe Abatutsi ikomeje kwanikira izindi mu gusurwa n’abantu benshi, aho kuva ishinzwe imaze gusurwa n’abasaga ibihumbi 196.

Iyi ngoro iherereye mu nyubako y’Inteko Ishinga Amategeko y’u Rwanda ku Kimihurura imaze umwaka n’amezi hafi 10 kuko yafunguwe ku mugaragaro na Perezida Paul Kagame ku wa 13 Ukuboza 2017.

Ubwo yatangazaga ibikorwa manda ya Sena ya kabiri yakoze mu myaka umunani ishize kuri uyu wa 8 Ukwakira, Perezida wa Sena mu Rwanda, Bernard Makuza, yavuze ko banagize uruhare mu iyubakwa ry’Ingoro y’urugamba rwo guhagarika Jenoside iri mu zisurwa cyane.

Ati “Bigaragara ko ibitse amateka yakozwe mu buryo bwa gihanga, ndetse dukurikije amakuru y’urwego rubishinzwe binagaragara ko ariyo nzu ndangamateka isurwa cyane. Ubu imaze gusurwa n’abantu barenga ibihumbi 196.”

Senateri Makuza yavuze ko hashize igihe gito iyo mibare igaragajwe n’abashinzwe iyi ngoro kandi abayisura baza buri munsi nta gushidikanya ko banarenzeho.

Ntabwo Senateri Makuza yasobanuye ijanisha ry’abanyamahanga bayisura gusa ngo urebye ku mwaka nibura bigaragara ko isurwa n’abantu barenga ibihumbi 100. Ati “Ikaba ariyi ngoro isurwa cyane kurusha izindi.”

U Rwanda rufite ingoro umunani z’umurage w’u Rwanda ziherereye mu bice bitandukanye by’igihugu. Ikigo cy’Ingoro z’umurage w’u Rwanda kigaragaza ko kuri ubu ingoro ndangamurage zisurwa n’abantu 272 636, barimo Abanyarwanda 78% mu gihe zinjiza miliyoni 310 643 966 Frw.

Mu 2018 cyatangaje ko Ingoro y’amateka y’urugamba rwo guhagarika Jenoside niyo yari yasuwe cyane, ikurikirwa n’Ingoro y’Imibereho y’abanyarwanda i Huye, Ingoro y’Abami i Nyanza n’Ingoro y’Ubugeni n’ubuhanzi yahoze yitwa iy’abaperezida iri i Kigali.

Gusura Ingoro z’umurage w’u Rwanda abana n’abanyeshuri bishyura 700 Frw, abakuru bishyura 1500 Frw , abo muri Afurika y’Iburasirazuba bishyura 3000 Frw naho abandi banyamahanga bakishyura 6000 Frw.

Muri iyi manda ya Sena yatangiye mu 2011, hakozwe ibikorwa bitandukanye birimo kugira uruhare mu ishyirwaho ry’amategeko asaga 270, kwemeza abayobozi basaga 250, gukora ubushakashatsi butandukanye ku iyubahirizwa ry’amahame remezo n’ibindi.

Ingoro ndangamateka y’urugamba rwo guhagarika jenoside imaze gusurwa n’abasaga ibihumbi 196
Iriho ikibumbano cy'umusirikare wunamiye bagenzi be
Ingoro Ndangamateka y’Urugamba rwo guhagarika Jenoside yafunguwe na Perezida Kagame
Hejuru y'Ingoro Ndangamateka y’Urugamba rwo guhagarika Jenoside hubatswe igice kigaragaza uko rwagenze

Amafoto: Muhizi Serge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza