Ububiko bw’Ikigo cy’igihugu cy’ubuzima (RBC) buherereye mu karere ka Kicukiro bwibasiwe n’inkongi y’umuriro mu gice cyari kigenewe ububiko bw’ibikoresho byo mu biro. Ikigo cy’igihugu cy’ubuzima kiramara impungenge abaturage ko nta kizahinduka ku bijyanye na serivisi z’ubuvuzi zisanzwe zitangwa, kuko igice kibikwamo imiti kitafashwe n’iyo nkongi.

Iyo nkongi y’umuriro yibasiye kimwe mu bice bigize inyubako ikoreramo serivisi z’ububiko bwa RBC. Iyo mpanuka ikaba yabaye ahagana saa saba n’igice z’amanywa ku wa mbere tariki ya 22 Mata 2013.

Mutuyeyezu Jean Bosco nyir’inyubako, yavuze iyo mpanuka yabaye na we ahari, bakaba ngo batunguwe no kubona umwotsi ucumba ari mwinshi uturuka muri icyo gice. Yakomeje asobanura ko bagerageje kuzimya iyo nkongi y’umuriro, ariko bikaba iby’ubusa kuko wagendaga wiyongera ari na bwo bitabaje imodoka za kizimyamoto zabugenewe z’ishami rya polisi.

Yagize ati «Twabonye umwotsi uzamuka hariya mu idirishya, ubwo ni bwo twamenye ko hari ikibazo ubwo duhita dushaka uko tugikemura niyo mpamvu mubona twapfumuye hariya kugira ngo tumenye aho umuriro uturutse, twabanje gukoresha za kizimyamwoto kugeza ubwo police yatabaraga.»

Ushinzwe itumanaho mu kigo cy’igihugu cy’ubuzima RBC Arthur Asiimwe yatangaje ko ibikoresho byahiye nta gihombo gikomeye bizateza kuko ngo iyo nkongi itibasiye imiti. Ati “Muri byo harimo computer, ameza, intebe zishaje hamwe n’impapuro nyinshi za kera twari twarabitse kugira ngo nitubona umwanya tuzabiteze cyamunara cyangwa se tubitwike.”

Kugeza ubu icyateje iyo mpanuka ntikiramenyekana. RBC iramara abaturage impungenge ko nta kizahinduka ku bijyanye na serivisi z’ubuvuzi zisanzwe zitangwa kuko igice kibikwamo imiti kitafashwe n’iyo nkongi y’umuriro.

Inkuru dukesha ikigo cy’igihugu cy’itangazamakuru (ORINFOR)