Umuyobozi w’ishyirahamwe ry’abaganga bigenga mu Rwanda Dr.Jean Nyirinkwaya yasobanuriye abanyamakuru ko iyi nama ya kane y’Ishyirahamwe ry’abaganga bigenga muri Afurika y’iburasirazuba (EAHF) igamije guteza imbere ubuvuzi mu nzego zose.

Yagize ati ”Iyi nama igamije guteza imbere inzego zose zifite aho zihurira n’ubuvuzi, ari na yo mpamvu izitabirwa n’Abayozi bakuru batandukanye barimo Minisitiri w’Intebe Anastase Murekezi na Minisitiri w’Ubuzima Dr.Agnes Binagwaho, n’abandi bazaturuka mu bihugu byo hanze.”

Yongeyeho ko iyi nama izitabirwa n’inzobere mu by’ubuvuzi zigera kuri 375 zizaturuka mu bihugu bisaga 20 bitandukanye ku Isi, ikazamara iminsi itatu kuva kuwa 17 Gicurasi Kugeza kuwa 19 Gicurasi 2015.

Dr. Nyirinkwaya yongeyeho ko iyi nama izanoza imikoranire hagati y’ibi bihugu mu by’ubuvuzi bw’igenga aho umurwayi azajya yoroherezwa kuvurirwa hanze cyangwa umuganga akava hanze akaza mu Rwanda mu gihe byabaye ngombwa, izi nzego zibimufashijemo.

Dr.Jean Nyirinkwaya, Umuyobozi w’ishyirahamwe ry’abaganga bigenga mu Rwanda