Israel: Abanyarwanda biga muri Kaminuza ya Kinneret bibutse Jenoside yakorewe Abatutsi

Yanditswe na Evariste Nsengimana
Kuya 15 Mata 2019 saa 03:54
Yasuwe :
0 0

Abanyarwanda biga muri Kaminuza ya Kinneret muri Israel n’inshuti zabo, bahuriye mu gikorwa cyo kwibuka ku nshuro ya 25 inzirakarengane zazije Jenoside yakorewe Abatutsi.

Iki gikorwa cyateguwe na Ambasade y’u Rwanda muri Israel ifatanyije n’abanyeshuri biga muri Kaminuza ya Kinneret, ari nayo cyabereyemo ku wa 12 Mata 2018.

Cyaranzwe n’isengesho ryo gusabira abazize Jenoside yakorewe Abatutsi, umunota wo kubibuka no kubasubiza icyubahiro bambuwe, indirimbo na filimi bivuga kuri iyo Jenoside.

Ambasaderi w’u Rwanda muri Israel, Col. Joseph Rutabana, yasobanuriye abo banyeshuri amateka ya Jenoside yakorewe Abatutsi n’insanganyamatsiko yo kwibuka ku nshuro ya 25, ariyo ‘Kwibuka Twiyubaka’ ababwira ko bishingiye ku murage w’ubumwe n’ubudahangarwa rw’abanyarwanda.

Amb. Rutabana yibukije ko urubyiruko arirwo cyane cyane rufite inshingano zo gufasha guverinoma y’u Rwanda guhindura igihugu cyiza.

Yavuze ko kuva cyera Guverinoma y’u Rwanda yahisemo kubakira ku bumwe, ubwiyunge n’iterambere kugira ngo abanyarwanda bose bazagire ahazaza heza.

Amb. Rutabana yavuze ko imiryango mpuzamahanga ikwiye gufasha mu guhangana n’ingengabitekerezo ya Jenoside, ibihugu bigaca umuco wo kudahana bishyikiriza ubutabera abakekwaho gukora Jenoside yakorewe Abatutsi.

Amb. Rutabana yavuze ko u Rwanda na Israel ari ibihugu bisangiye byinshi, unahereye kuri Jenoside byose byagize mu kinyejana cya 20 [Iyakorewe Abayahudi n’iyakorewe Abatutsi mu Rwanda].

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza