UGHE Rwanda izatangira umwaka utaha mu isura idasanzwe kuko kuva muri Mutarama 2019 izimukira ku cyicaro gikuru kiri mu Murenge wa Butaro mu Karere ka Burera.

Inyubako nshya z’iyi kaminuza zubatse ku buso bwa hegitari zisaga 100. Izubakwa mu byiciro bine aho izaba ifite ubushobozi bwo kwakira abanyeshuri 1000 buri mwaka.

Imirimo yo kubaka icyiciro cya mbere kizakira abanyeshuri 100 yatwaye asaga miliyoni $7, akabakaba miliyari 6 Frw.

Iyi nyubako ifite inyubako esheshatu zirimo izaba ikoreramo ibiro by’abayobozi, isomero rikoresha ikoranabuhanga n’irikoresha ibitabo, hari kandi laboratwari, ibyumba by’amashuri n’amacumbi y’abanyeshuri, abarimu n’abakozi.

Guverineri w’Intara y’Amajyaruguru, Gatabazi Jean Marie Vianney, yasuye iyi nyubako ku wa 18 Ukuboza 2018, ashima aho imirimo yo kuyubaka igeze.

Yavuze ko ku wa 18 Mutarama 2018 abanyeshuri ba mbere bazaba bayitangiyemo amasomo.

Mu kiganiro yagiranye na IGIHE, Guverineri Gatabazi, yavuze ko Kaminuza ya UGHE itanga ubumenyi buhanitse, ndetse ifite ibikorwa remezo bifasha umunyeshuri kwiga neza.

Yagize ati “Iri shuri rizigisha mu buryo bugezweho, rifite amasomero meza agezweho. Ryubatse ku buryo buri ku rwego rwo hejuru ku buryo nta wavuga ngo ni uko ari muri Afurika ntabwo najya kwigayo kuko n’umuntu uturutse i Burayi yaza kuhigira.”

Yakomeje avuga ko “Ni mu rwego rwo kuzamura agaciro n’ireme ry’uburezi butangwa mu gihugu ku buryo abantu bajyaga gushaka za kaminuza mu mahanga bazisanga mu Rwanda.”

Kaminuza ya UGHE yashinzwe mu 2015, n’Umushinga ‘Inshuti mu Buzima’ (Partners in Health) hagamijwe gutanga impamyabumenyi kuva ku Cyiciro cya Mbere cya Kaminuza (Undergraduates) kugeza ku cya Gatatu (Master of Science in Global Health Delivery/ MGHD).

Ahari kubakwa iyi kaminuza himuwe imiryango 120 yahawe ingurane. Inyigo yo kubaka icyiciro cya kabiri cy’inyubako za kaminuza izakorwa mu 2019.

Guverineri Gatabazi yavuye i Burera anasuye ahari kubakwa icumbi rigenewe abarwaza bazana abarwayi ba kanseri mu Bitaro bya Butaro. Ryatangiye kubakwa mu 2017, bikaba byitezwe ko mu 2019 rizatangira gukoreshwa.

Dr. Agnes Binagwaho asobanura ibijyanye n'imyigishirize uko bizaba bimeze muri iyi kaminuza

Guverineri Gatabazi na Meya w'Akarere ka Burera (wambaye umupira w'umuhondo) n'abandi bayobozi baherekeje Guverineri

Guverineri Gatabazi n'itsinda ryamuherekeje imbere mu byumba bigize inyubako

Guverineri Gatabazi yasobanuriwe ibijyanye n'imiterere y'iyi kaminuza n'uko icyiciro cya mbere cyubatswe

Guverineri w'Intara y'Amajyaruguru, Gatabazi Jean Marie Vianney

Ibyangombwa birimo intebe byamaze kugezwa muri iyi kaminuza

Ifite inyubako zidasanzwe

Imbere mu nyubako ahazajya hakorerwa inama niho Guverineri Gatabazi yakoresheje ageza ijambo ku bari bitabiriye igikorwa cyo gusura imirimo yo kubaka kaminuza

Kaminuza ya UGHE izaba yubatse ku buso bwa hegitari zigera ku 100

Kureba iyi nyubako biteye ubwuzu

Dr Agnes Binagwaho wigisha muri Kaminuza ya UGHE (iburyo), Guverineri Gatabazi (hagati) na Meya w'Akarere ka Burera, Uwamariya

Bafata ifoto y'urwibutso ahari kubakwa iyi kaminuza ya UGHE