Mu rwego rwo gukangurira abagenzi kwirinda impanuka za hato na hato ziterwa no gukoresha cyangwa kugenda nabi mu muhanda, kuri uyu wa Mbere tariki ya 16 Kamena 2014, i Rugobagoba mu Karere ka Kamonyi habereye igikorwa cyo gusobanurira abakoresha umuhanda amategeko yo kuwukoresha ngo birinde gukora impanuka.

Abitabiriye iki gikorwa basobanuriwe ko umuhanda atari umuharuro bityo basabwa kujya bigengesera mu gihe bari mu muhanda kandi abanyamaguru basabwa kujya bashishoza mbere yo kwambukiranya umuhanda.

Mu gikorwa cyo gusibura inzira yagenewe abanyamaguru cyabereye I Rugobagoba mu Kagari ka Kigembe mu Murenge wa Gacurabwenge muri Kamonyi, Polisi y’ Igihugu ikorera muri aka karere ifatanyije n’ubuyobozi bw’ akarere bongeye kwibutsa abakoresha umuhanda ko baba abagenzi bagenda n’amaguru n’abakoresha ibinyabiziga kujya buri gihe bitwararika.

Supt Hamza Vita (ibumoso) afatanya n'Umuyobozi w'Akarere Wungirije mu gusibura inzira y'abanyamaguru

Umuyobozi wa Polisi muri aka karere Spt Hamza Vita akomeza asobanura ko muri uyu muhanda munini uva mu mujyi wa Kigali werekeza mu Ntara y’Amajyepfo cyane cyane kuri iki gice cya Kamonyi hakunze kuba impanuka bityo asaba abakoresha umuhanda kujya bigengesera.

Supt. Hamza ati "Nibura mu cyumweru kimwe hari igihe tugira impanuka zitari munsi y’enye zikomoka ku mpanuka ahanini zikaba ziterwa n’umuvuduko ukabije w’abashoferi”.

Kimwe n’inzego z’umutekano zari zitabiriye iki gikorwa, Umuyobozi w’Akarere ka Kamonyi Wungirije Ushinzwe imibereho Myiza y’abaturage Uwera Marie Alice, nawe yakanguriye abakoresha umuhanda kwirinda icyo ari cyo cyose gishobora gukurura impanuka, by’umwihariko asaba abatwara ibiyabiziga kwirinda umuvuduko ukabije, abasaba kandi kubahiriza uburenganzira bw’abanyamaguru.

Ku ruhande rw’abamotari nka bamwe mu bakunze kuvugwaho kuba intandaro z’impanuka mu muhanda, BIZIMANA Jean Baptiste umuyobozi w’abamotari mu Karere nawe yagarutse ku bijya bitera impanuka avuga ko buri muntu agomba kugira uruhare mu kuzirinda. Yasabye bagenzi be kujya bagenda neza mu muhanda, bakirinda icyo ari cyo cyose cyakurura impanuka.

Kimwe n’ahandi mu gihugu, gukangurira abagenzi gukoresha umuhanda neza bikozwe mu gihe hirya no hino mu turere bari mu cyumweru cyahariwe ibikorwa bya Polisi, aho uru rwego rw’umutekano rufatanya n’abaturage mu bikorwa byihariye biri mu nshingano za polisi, izi gahunda zikaza ziyongera ku bindi bikorwa by’iterambere abaturage bahuriramo na polisi mu rwego rwo kwiyubakira igihugu.