Bigenimana uri mu kigero cy’imyaka 27 y’amavuko, yatawe muri yombi na polisi, akurikiranweho gukoresha inkota agakomeretsa k’ukuboko Rutayisire Emmanuel, umuyobozi ushinzwe umutekano mu mudugudu.

Ibi byabereye mu mudugudu wa Mirambi III, Akagari ka Rwimishinya, Umurenge wa Rukara, Akarere ka Kayonza, Intara y’Iburasirazuba, ku wa mbere tariki ya 14 Ukwakira 2013.

Rutayisire Emmanuel aganira na IGIHE, yatangaje ko yamenye amakuru y’uko hari abakobwa babiri bacumbikiwe muri uwo mudugudu, mu rugo rwa Bigenimana kandi ubuyobozi butabizi. Muri uwo mugoroba wo ku wa 13 Ukwakira, Rutayisire ushinzwe umutekano yagiyeyo, mu rwego rwo kureba ko baba bafite ibyangombwa. Agezeyo yasanze ntabyo bafite, yifashisha abandi bashinzwe umutekano birukana abo bakobwa bari baje kuraza uwo musore.

Uyu musore yaje kurakara cyane ariko abura uko abigenza kuko abashinzwe umutekano bari benshi, mu gitondo cyo ku wa mbere tariki ya 14 ukwakira 2013, ni bwo yabonye Rutayisire anyuzeho aba anyarukiye mu nzu, afata inkota agiye kuyimutera mu gatuza akinga ukuboko aba ariho ayimutera aramukomeretsa.
Amaze gukora ayo mahano yahise yiruka ashaka gutoroka ariko abaturage bahita bamuta muri yombi, ashyikirizwa abashinzwe umutekano.

Umuyobozi w’umudugudu wa Mirambi III, Karenzi Namani yatangaje ko uyu musore watawe muri yombi akurikiranweho icyaha yakoze cyo gutema umuyobozi ushinzwe umutekano mu mudugudu.

Akomeza avuga ko uyu musore asanzwe azwiho kugira urugomo, kuko yigeze no gukubita umwana witwa Muhire uri mu kigero cy’imyaka 16 bikamuviramo urupfu, icyo gihe yari atuye mu mudugudu wa Mirambi ya II. Yaratorotse, nyuma agarutse arafatwa arafungwa, ariko aza kurekurwa.

Uwakomerekejwe yahise ajyanwa ku kigo Nderabuzima cya Karubamba, ubu akaba yoherejwe ku bitaro bya Gahini.