Ubushinjacyaha bwa ICC bumaze gutangaza ko nta bimenyetso bifatika , bidashobora gushidikanywaho byagenderwaho ngo Perezida wa Kenya, Uhuru Kenyatta abe yaburanishwa ku byaha byibasiye inyoko muntu yashinjwaga.

Yari akurikiranweho uruhare mu mvururu zahitanye Abanyakenya b’abasivili mu matora yo mu 2007.

Abacamanza ba ICC bari baherutse gusaba umushinjacyaha mukuru w’urwo rukiko Fatou Bensouda gutanga ibimenyetso bifatika bishinja Kenyatta yabibura akamugira umwere bitarenze icyumweru.

Abashinjacyaha muri ICC, bavuze ko bahagaritse ibikorwa byose byo gukurikirana Umukuru w’igihugu cya Kenya, ariko banashimangira ko igihe cyose haboneka ibindi bimenyetso bifatika urubanza rwasubira ibubisi.

Ubwo yitabaga uru rukiko mu Kwakira uyu mwaka, Perezida Kenyatta yahakanye ibyaha yari akurikiranweho byose uko byakabaye.

Benshi mu bakuru b’ibihugu by’Afurika bari bagaragaje kutishimira icyemezo cy’uko yakurikiranwa mu gihe cyose acyicaye ku ntebe y’ubuyobozi bw’igihugu cya Kenya, bavuga ko byaba ari ugusuzugura abakuru b’ibihugu byo kuri uyu mugabane.