Koperative y’abatwara abagenzi kuri moto ikorera mu murenge wa Gikondo mu karere ka Kicukiro, ivuga iteganya kubaka inzu ifite agaciro ka miliyoni zisaga 50, azava mu musanzu w’amafaranga 300 batanga ku munsi.

Iki gikorwa bavuga ko kiyongera ku bikorwa byo gufasha abatishoboye, byose bikaba biteganyijwe mu 2015.

Ibi babitangaje mu gikorwa cy’ubusabane cyahuje abamotari 160 bibumbiye muri Koperative COTAMOGI, cyabaye tariki ya 30 Ukuboza bishimira ibyo bagezeho mu 2014.

Zimwe mu ngamba z’ibyo bifuza kuzagerabo, birimo kwishyurira abatishoboye ubwisungane mu kwivuza, gukora umuganda n’ibindi bitandukanye.

Baranoga Pascal umuyobozi w’iyi koperative yavuze ko n’ubwo bashyize imbere iterambere ry’abaturage, nabo ubwabo bizirikanye kuko bishyuriye abanyamuryango bagera 120 ubwisungane mu kwivuza, bakaba bagiye no kubaka ibiro by’iyi koperative ikava mu bukode.

Yagize ati “Dutanga umusanzu w’amafaranga 300 buri munsi, ayo rero niyo tuzasabiraho inguzanyo hanyuma tukubaka inzu yacu yo gukoreramo. Ikibanza cyo twamaze kukigura mu murenge wa Gahanga.”

Akomeza avuga ko kwishyurira umumotari mitiweri atari uko aba yabuze amafaranga yo kuyiyishyurira, ahubwo ngo basanze bamwe muri bo bahugira mu gushaka amafaranga, ntibuke kwishyura ubwisungane bwo kwivuza.

Abamotari bahawe mitiweli

Baranoga avuga iyi nyubako bazubaka mu mwaka wa 2015, izaba igizwe n’inzu nini , igaraji hamwe n’ibyumba byo gukodesha.Ibi bakazabigeraho bifashishije inguzanyo bazasaba muri Banki y’abaturage ya Gatumba mu karere ka Ngororero , ndetse ngo bakaba baramaze kuyemererwa.

Ndayambaje Musafiri ni umwe mu bahawe ubwisungane mu kwivuza. Yagize ati “Hari igihe umuntu ahugira mu gushaka amafaranga, akibagirwa kwishyura mitiweri umwaka ugashira undi ugataha, ariko iki gikorwa abayobozi ba Koperative badukoreye ni ingirakamoro, kuko n’ubutaha n’iyo batabikora umuntu azajya yibuka ko agomba kuyigurira, kuko hari n’abajyaga babisuzugura.”

Nk’uko abanyamuryango ba COTAMOGI bakomeza babivuga, ngo mu mwaka wa 2014 biteje imbere muri byinshi birimo kwigurira Moto binyuze mu kwizigamira.

[email protected]