Ibigo byatsindiye isoko ryo gutwara abagenzi mu Mujyi wa Kigali byasinye amasezerano n’Umujyi wa Kigali hamwe n’ Ikigo cy’igihugu ngenzuramikorere (RURA) yo gutwara abagenzi.
Ibigo byatsindiye isoko ryo gutwara abagenzi , KBS, R.F.T.C na Royal, byashyize umukono kuri ayo masezerano yo gutwara abagenzi akubiyemo za kirazira zitandukanye, n’ibihano bizajya bihanishwa abatazubahiriza ibyo bashyizeho umukono.
Ayo masosiyete avuga ko kuri uyu wa Gatanu, tariki ya 30 Kanama, nk’itariki ntarengwa bari bahawe biteguye gutangira gukorera ku mazone bahawe, bagaca guheza abagenzi ku muhanda.
Imodoka zose bavuze ko baziteguye, bazisiga amabara azajya aziranga, n’abakozi bayo bambaye imyenda y’akazi isa.
Uyu muhango wabereye ku biro by’Umujyi wa Kigali, kuri uyu wa 29 kanama 2013, witabiriwe n’abayobozi batandukanye barimo Umuyobozi w’umujyi wa Kigali Fidele Ndayisaba, Umuyobozi wa RURA, Maj. Francois Regis Gatarayiha, Umuyobozi wa Polisi ishinzwe umutekano mu muhanda, abayobozi b’uturere tugize Umujyi n’abayobozi b’ibigo byatsindiye gutwara abagenzi.
Ndayisaba yijeje ko abatsindiye gutwara abagenzi mu Mujyi bigaragara ko bizatanga umusaruro mu guca ibibazo byari bihari, ati “Ntitwahamya ko ibibazo byose biri mu gutwara abagenzi bizahita bikemukira rimwe 100% ariko niyo ntego twihaye, kandi ibirimo abantu nta kinanirana.”
Yavuze kandi ko hashyizweho urwego rugizwe n’abantu batandatu bagize uruhare mu gukurikirana iyi gahunda no kuyishyira mu bikorwa, bakazakurikirana umunsi ku munsi imikorere y’ibi bigo, bakareba ibibazo bivuka bakabikemura, ibikeneye guhindurwa bakabihindura, ibikeneye gutunganywa bakabitunganya.
Uru rwego rukaba rugizwe na Minisiteri y’ibikorwa remezo, Polisi ishinzwe umutekano mu muhanda, RURA, Urugaga rw’abikorera harimo n’abatsindiye isoko ryo gutwara abagenzi n’Umujyi wa Kigali.
Umuyobozi wa KBS, Ngarambe Charles, yatangaje ko biteguye gutanga serivise kandi ko muri zone bazakoreremo bazaba intangarugero.
Yibukije abagenzi kuzitabira gukoresha amakarita mu kwishyura, kandi avuga ko mu minsi ya vuba hazajyaho uburyo bwo gukorana kw’abatsindiye isoko ryo gutwara abagenzi, ku buryo uzaba afite ikarita yarishyuye ikigo kimwe yajya mu modoka z’ikindi kigo atiriwe yishyura.
TANGA IGITEKEREZO