Uyu musore yafashwe kuri uyu wa Kane, tariki ya 18 Gicurasi ahagana saa saba z’amanywa nyuma y’amakuru yatanzwe n’abanyeshuri bari bamurabutswe mu cyumba gikorerwamo ubushakashatsi (lab).

Kuwa Gatanu w’icyumweru gishize, nibwo uyu musore yinjiye muri lab aterura imashini y’uwitwa Willy wiga mu bijyanye na Information System muri UNILAK, nyuma yo kumureba ku jisho asohotse hanze.

Umwe mu banyeshuri bo muri Kaminuza ya UNILAK utashatse ko amazina ye atangazwa yavuze kuva iyi mashini yabura, nyirayo yatangiye kuyikurikirana anasaba ubuyobozi kumufasha.

Yagize ati “Uyu munsi hari umuntu wafashwe akurikiranyweho kwiba imashini y’umunyeshuri. Mu cyumweru gishize nibwo amakuru y’ibura ry’iyo mashini yasakaye. Icyo gihe ubuyobozi bwasubiye mu mashusho yafashwe na camera zo muri lab, babona umuntu aterura igikapu cyarimo imashini. Badusabye ko uwazamubona yazahita atungira agatoki ubuyobozi.”

Uwo musore bivugwa ko yinjiye muri lab aje gukora ubushakashatsi nk’abandi banyeshuri bose ariko afite intego yo guterura imashini.

Yakomeje agira ati “Amashusho yagaragaje ko uwibye imashini yacunze nyirayo asohotse hanze ahita ayiterura anamunyuraho asohoka.”

Willy uyu munsi nibwo yabonye umuntu usa n’uwo beretswe mu mashusho yafashwe na camera aza muri lab nk’ibisanzwe ahita abimenyesha ubuyobozi.

Amakuru IGIHE ifite ni uko ngo yafashwe nyuma yo kugerageza guterura igikapu ngo yumve ko kirimo laptop nkuko amashusho yahise abigaragaza.

Akimara gufatwa yabanje kubeshya ko yiga muri UNILAK ariko barebye mu bitabo byabo ntibamubonamo. Yaje no kwemera ko yibye iyo mashini ariko ahakana ko hari abo bari bafatanyije biga muri iyi Kaminuza.

Ubuyobozi bwa Kaminuza bwahise bwitabaza Polisi y’igihugu mu Mujyi wa Kigali mu rwego rwo gukomeza gukora iperereza.

Kuva mu mpera za Mata, amakuru agaragaza ko abanyeshuri bari bamaze kwibwa imashini enye n’ibikapu byazo mu buryo nk’ubu bw’amayobera.