Abayobozi b’umuryango wa FPR Inkotanyi mu Murenge wa Kimihurura mu Karere ka Gasabo mu Mujyi wa Kigali bahuriye mu nteko rusange hagamijwe kwisuzuma barebera hamwe ibyo bafitemo imbaraga nke no kubifatira ingamba mu rwego rwo kurushaho kunoza inshingano z’abanyamuryango babagiriye icyizere bakabatora.

Muri iyi nteko rusange yabaye kuri uyu wa Gatandatu tariki ya 7 Gashyantare 2015 aba banyamuryango ba FPR Inkotanyi bemeranyije ko bimwe mu bibazo bari guhura na byo biterwa n’uko hari bamwe mu banyamuryango basigaye bariraye ntibite ku bikorwa by’umuryango birimo nko gutanga umusanzu wa buri kwezi, kutitatabira inama zitandukanye mu gihe byari muri bimwe mu mihigo biyemeje.

Gakwaya Lawrenceci umuyobozi w’umuryango mu rwego w’umurenge wa Kimihurura

Aba banyamuryango bagaragaje ko bishimiye ibikorwa bagezeho birimo kwicanira amatara yo ku muhanda mu Kagari ka Rugando ahantu hareshya n’ibirometero 9, igikorwa cyo guha bamwe mu baturage inguzanyo mu Murenge SACCO bari mu ishyirahamwe ry’Indatsikira n’uburyo igikorwa cya gahunda ya Girinka cyagenze neza.

Muri bimwe mu byo aba banyamuryango batishimiye ndetse bifuza ko byahinduka, ni uko inama zitandukanye zitakitabirwa nka mbere, n’igikorwa cyo gutanga umusanzu w’umuryango mu Murenge nk’uko cyakorwaga mbere dore ko ubu bisa n’aho hari abanyamuryango biraye batakiwutanga nk’uko byagaragajwe n’abagenzura ibikorwa bya wo muri uyu Murenge.

Abari bayoboye inteko rusange

Gakwaya Lawrence Umuyobozi w’umuryango mu rwego w’Umurenge wa Kimihurura na we yemeye ko hari abanyamuryango biraye batakitabira inama, ariko avuga ko bagiye kwikubita agashyi bakikosora.

Ati “ Ntabwo twavuga ko abanyamuryango bose batagitanga umusanzu cyangwa batakitabira inama, ahubwo bitewe n’uko igihugu cyacu cyakataje mu iterambere bigatuma hari na bamwe bataboneka kubera impamvu zitandukanye, kuko usigaye usanga abantu bose biyitaho cyane kurusha uko bita ku bikorwa by’umuryango, uretse ko ubu twemeje ko tugiye kwikubita agashyi kugira ngo abantu bitabire inama kuko ari n’aho umusanzu utangirwa”.

Abitabiriye inteko rusange

Muri iyi nteko rusange abanyamuryango ba FPR Inkotanyi banemeranyije ko bagiye gushyira ingufu mu kurwanya ikoreshwa ry’ibiyobyabwenge mu rubyiruko kuko ari kimwe mu bidindiza iterambere ry’igihugu.

Abanyamuryango bari bitabiriye inama