Umuyobozi w’ishami rya REG rya Remera ari na ryo rishinzwe Umurenge wa Kimironko, Fred Kagabo, yatangaje ko transformateur nshya izatanga umuriro ukubye inshuro ebyiri uwatangwaga n’iyo basimbuje.

Yagize ati “Iyari ihari yari ifite ubushobozi bwa KVA 250 ariko ubu tuhashyize iya KVA 500 kuko iyari ihasanzwe itari igifite ubushobozi bwo gutanga umuriro ukenewe muri kariya gace.”

Kimwe n’utundi duce dutandukanye tw’Umujyi wa Kigali, Umudugudu w’Inganji wo mu Murenge wa Kimironko wateye imbere, wubakwamo inzu nyinshi ndetse n’abawutuye bariyongera, bigatuma hakenerwa umuriro mwinshi.

Kagabo yagize ati “Turateganya no kuvugurura umuyoboro w’amashanyarazi muri aka gace ku buryo ikibazo cy’umuriro muke cyangwa ucika kizakemuka mu buryo burambye.”

Yongeyeho ko uko abaturage batera imbere ari na ko akenshi bagenda bagura ibikoresho bikenera umuriro mwinshi nk’ibikonjesha, ibishyushya n’ibindi binyuranye bituma umuriro ukenerwa usaba transformateur ifite ubushobozi bwisumbuyeho.

Abenshi mu bakoresha ibikoresho bikenera umuriro mwinshi muri iriya midugudu a ntibari bakibasha kubikoresha uko babyifuza.

Ikibazo kikimara gukemurwa, Depite Ruku-Rwabyoma John utuye muri Kimironko yagize ati “Iyi ni inkuru nziza ku batuye muri aka gace kuko bari babangamiwe n’iki kibazo. Ubu noneho twizeye ko ibikoresho byacu byongera gukora uyu mugoroba.”

REG igaragaza ko ingo z’abaturage bafite umuriro zigera kuri 41% mu gihugu hose. Umubare ukomeje kuzamuka cyane cyane i Kigali, aho ubu ingo zigera kuri 82% zifite amashanyarazi.