Mu bibazo byari byugarije bamwe mu bashigajwe inyuma n’amateka bo mu murenge wa Kitabi, mu karere ka Nyamagabe, harimo imyumvire n’imitekerereze yo gukura imibereho mu ishyamba rya Nyungwe. Nyuma yo gusobanurirwa uburenganzira bwabo, imiryango itanu y’abasigajwe inyuma n’amateka yasezeranye imbere y’amategeko, abana bagera kuri 40 bandikwa mu bitabo by’irangamimerere.
Imyumvire, imitekerereze no gukura imibereho mu ishyamba ku basigajwe inyuma n’amateka mu murenge wa Kitabi, byatumye umuryango REDO (Rural Environment and Development Organisation) wita ku bidukikije n’iterambere ry’icyaro, unafite muri gahunda zawo guteza imbere abashigajwe inyuma n’amateka, ku nkunga y’umuryango TROCAIRE bakora ibikorwa byo kwigisha Abasigajwe inyuma n’amateka, gusoma, kubara no kwandika, bishingiye ku burenganzira bw’ibanze bwa muntu ndetse no guharanira kwigira.
Ibyo ni na byokandi byatumye imiryango igera kuri itanu y’abasigajwe inyuma n’amateka mu kagari ka Mujuga, Umurenge wa Kitabi, yabanaga mu buryo butemewe n’amategeko ifata icyemezo cyo gushyingiranwa imbere y’amategeko, ku wa Gatanu tariki ya 02 Kanama 2013, ndetse abana bagera kuri 40 bandikishwa mu bitabo by’indangamimere.
Nk’uko Abasigajwe inyuma n’amateka bari basezeranye kuri uwo munsi babyivugira, iki cyemezo bagifashe nyuma yo kwigishwa n’umuryango uharanira kurengera ibidukikije n’iterambere ry’icyaro (REDO). Ruvugundi Jean Claude, umwe mu basigajwe inyuma n’amateka ashimira ubuyobozi ndetse na REDO uburyo bakomeza kubaba hafi.
Ati “sinari naragize amahirwe yo kwiga ndi muto kubera ubukene bwari bwaratwokamye, ariko ubu nsigaye nzi gusoma ibyapa, ndetse ntibicyorohera abacuruzi kunyiba iyo hari ikintu ngomba gupimisha ku munzani.”
Nubwo ariko hari byinshi bagenda bageraho, baracyafite ibyifuzo byo kuba barushaho kwegerwa, bakagenda biyumva nk’abandi banyarwanda. Kuri icyo cyifuzo, umuyobozi wa REDO Gashumba Damascène avuga ko nyuma yo kubigisha ibirebana n’uko imibereho iri nyuma y’ishyamba, hari gahunda yo kubagezaho imishinga ijyanye no kubungabunga Nyungwe, aho bagiye kubafasha mu byerekeranye n’Ubuvumvu, babagezaho imizinga igera kuri 40 ya kijyambere kandi izaba umusaruro uhagije.
Ibyo bishimangirwa n’umunyamabanga Nshingwabikorwa w’Umurenge wa Kitabi Kabanda Jean Claude, wemeza ko icyiciro cy’abasigajwe inyuma n’amateka kimaze gutera intambwe ishimishije, aho bagenda bava mu mwuga wabo gakondo w’Ububumbyi bakumva ko hari indi mirimo bakora.
Agira ati “Uretse ibyo, babaga muri nyakatsi none ubu ngo batujwe mu midugudu, bashyirwa hamwe muri koperative, bahabwa inka ndetse batuzwa hafi y’abandi banyarwanda mu rwego rwo kubafasha kudakomeza kubaho ukwabo.”
TANGA IGITEKEREZO