Kuri uyu wa Gatanu tariki ya 11 Kanama hano i Kigali, himitswe umuyobozi mushya wa Rotary Club ugiye kuyiyobora mu bihugu 10 byo muri aka karere mu gihe cy’umwaka, uyu ni Umunyarwanda Jean Runuya, ikaba ari nayo nshuro ya mbere hatowe Umunyarwanda ku buyobozi bwa District za Rotary Club.
Uyu muhango wari mu gikorwa cyo gutangiza umwaka mushya wa Rotary Club 2014-2015, igikorwa cyakomatanyirijwe hamwe no kurahiza umuyobozi mushya wa Rotary Club zo mu bihugu 10, Umunyarwanda Jean Runuya, ndetse no kurahiza abayobozi bashya ba Rotary Clubs zo mu Rwanda bari bamazeho umwaka; muri iki gikorwa kandi hanarahijwe abanyamuryango bashya bane ba Rotary Clubs ebyiri muri esheshatu zikorera mu Rwanda.
Jean Runuya ugiye kuyobora bwa mbere Rotary Club zo muri ibi bihugu, yavuze ko iri ari ishema rikomeye ku Rwanda n’Abanyarwanda muri rusange, kuko wasangaga uyu muryango akenshi mu myanya yo hejuru uyoborwa n’abakomoka mu bindi bihugu.
Jean Runuya yemejwe nk’umuyobozi mushya mu matora yabereye muri Congo-Kinshasa mu mwaka wa 2012. Ibindi bihugu byari bihanganye n’u Rwanda kuri uyu mwanya birimo u Burundi, Congo-Kinshasa na Gabon, agiye kuri uyu mwanya asimbuye uwitwa Antoine Nkodia ukomoka muri Cameroun.
Jean Runuya yavuze ko kuba u Rwanda rugiriwe icyizere rukayobora ibihugu 10, ibikorwa uyu muryango ukora mu Rwanda bigiye kurushaho kumenyekana, ama clubs nayo arusheho kwiyongera, ndetse n’Abanyarwanda bakarushaho kuwusobanukirwa.
Uretse kandi kuba Rotary Club zo muri ibi bihugu zigiye kuyoborwa n’Umunyarwanda, urwego rw’urubyiruko rwo muri Rotary Club, umuryango witwa Rotaract nawo ugiye kuyoborwa n’Umunyarwanda.
Abandi bayobozi bashya barahiye ni abahagarariye Rotary Club Kigali, Rotary Club Kigali-Gasabo, Rotary Club Mont-Jali, Rotary Club Butare na Rotary Club Virunga. Kugeza ubu mu Rwanda hari Rotary Club esheshatu, nyuma y’indi nshya ya Kibungo yahawe uburenganzira bwo gutangira gukora kuri uyu wa Gatandatu tariki 12 Nyakanga 2014.
Ku bijyanye no kumenya niba uwemerewe kuba umunyamuryango wa Rotary arahira mu gihe umwaka urangiye, Runuya yagize ati “Iyo Club runaka imaze kukwakira ikakwemeza, kurahira bishobora guhita bibera imbere muri club, ntabwo bigira igihe.”
Rotary Club igiye kuzana abaganga b’inzobere mu Rwanda
Mu bikorwa ifatanyamo na Minisiteri y’Ubuzima, Rotary Club muri Kanama
izazana abaganga b’inzobere barenga 20 baturutse mu Buhinde, bazavura abarokotse Jenoside yakorewe Abatutsi bagize ibibazo byo kuvunwa ingingo z’umubiri.
Iyi ni inshuro ya gatatu Rotary izanye abaganga b’inzobere baza kuvura indwara zikomeye, kandi uburyo bwose bwo gufasha muri ibi bikorwa by’ubutabazi bugatangwa na Rotary.
Ngamije Lambert wari umuyobozi wa Rotary Club ya Kigali Doyen, we avuga ko ibikorwa bya Rotary Club bimaze gukorwa mu Rwanda ari byinshi, birimo kuba uyu muryango waragize uruhare rukomeye ngo isomero ry’u Rwanda riherereye mu Karere ka Gasabo ritangizwe, gutera ibiti hirindwa ubutayu, muri uyu mwaka wonyine ikaba igiye kuzatera ibiti birenga ibihumbi 3.
Jean Runuya watorewe kuyobora Rotary Club mu bihugu by’u Rwanda, Burundi, Congo Kinshasa, Congo-Brazaville, Gabon, Cameroon, Chad, Saotome et Principe na Guinea Equatorial, afite imyaka 52, akaba amaze imyaka 16 ari umunyamuryango wa Rotary Club. Ibi bihugu 10 bikaba bigize District 9150.
Rotary Club yashingiwe muri Leta Zunze Ubumwe za Amerika mu myaka irenga 100 ishize, abayijyamo bakaba ari abagaragaza umutima ufasha; kugeza ubu ikorera ku isi hose, aho ifite abanyamuryango barenga miliyoni 1,2.
TANGA IGITEKEREZO