00:00:00 IGIHE NETWORK KN KINYARWANDA EN ENGLISH FR FRANCAIS

Kuki kubona uruhushya rwo kugurutsa drones mu Rwanda bigorana?

Yanditswe na Muhonzire Sylvine
Kuya 16 Nzeri 2021 saa 09:23
Yasuwe :
0 0

Kugira ngo umuntu ushaka kugurutsa drones [akadege katagira abapilote] mu Rwanda abone uruhushya, bimusaba nibura ibyumweru hagati ya bibiri na bine ndetse bishobora no kugera ku mezi abiri kugira ngo abone ibyangombwa byose bimwemerera kuyivana ku butaka ngo ayigurutse mu kirere.

Ibi byakomeje kubera ihurizo abashaka kuzikoresha yaba mu buryo bwo kwishimisha cyangwa mu buryo bw’akazi, bibaza impamvu bifata iki gihe cyose.

Ubwo yari yitabiriye inama yateguwe n’Ikigo cy’Igihugu gishinzwe Indege za Gisivile (RCAA), igamije kureba aho isi igana mu bijyanye n’ikoreshwa rya drones, Minisitiri w’Ikoranabuhanga na Inovasiyo, Ingabire Paula, yavuze ko impamvu yo gutinda kw’izi mpushya biterwa no kugenzura ko utwo tudege tutazabangamira umutekano w’abaturage.

Yagize ati “Biterwa no gushaka kurinda umutekano w’isanzure cyangwa w’abantu. Utwo tudege tuba tugenda hejuru y’abantu uba unatureba ahantu tugurukira ariyo mpamvu hagiye hagaragara ko huzuzwa ibyangombwa byinshi cyane kugira ngo tuzagabanye ko habaho impanuka no kuba twahungabanya umutekano w’abaturage.”

Amategeko n’amabwiriza agenga ikoreshwa rya drones mu Rwanda yashyizweho na RCCA, arimo kuba utagurutsa drones itandikishije muri iki kigo, nta munyamahanga wemerewe kuyandikisha ariko biremewe ko umunyarwanda yayindikishaho mu mwanya we ndetse kugira ngo yandikwe bishobora kugera ku mezi atatu.

Umuyobozi ushinzwe kugenzura ingendo z’indege muri RCAA, Mutabaruka Andrew, yavuze ko impushya zo kugurutsa indege zidatinda igihe cyose, ndetse ko mu gihe zatinze biba byatewe n’abanze kuzuza amabwiriza yose asabwa.

Yakomeje agira ati “Kubera ko uruhushya rugomba gukurikiza inzira zose, iyo habayeho uruhande rumwe rutakoze neza ibyo rugomba gukora rushobora gutuma bitinda ariko icyifuzo cyacu ni uko bizajya bitebuka nibyo turi kugerageza gukora muri iki gihe kugira ngo dukosore aho bishobora kuba bitinda.”

Minisitiri Ingabire yasobanuye ko mu gihe iri koranabuhanga ryo gukoresha drones rizagenda ritera imbere n’ibisabwa ngo umuntu ayigurutse bizagenda byoroshywa ariko bitabangamiye umutekano w’abaturage.

Izindi mbogamizi zagaragajwe ni uko mu rwego rw’abakoresha drones hari ingamba zidahagije, kuba abaturage batazimenyereye ku buryo usanga hari abazishungera no kuba ibibazo bibonekamo bidakemurwa mu buryo bwihariye ku buryo byareshya abashaka kuzishoramo imari.

Umuyobozi wa Locus Dynamics ishamikiye kuri Ngali Holdings, Kagabo Wilson yagize ati “Mu rwego rwa drones nta buryo bwihariye bwashyizweho bwo kuyireberera no kuyikemurira ibibazo byabo byihariye, bityo ifatwa nk’irindi koranabuhanga risanzwe byose kubera ko nta ngamba zihagije zashyizweho.”

Rutayisire Eric, washinze ndetse akaba anayobora Charis UAS, yagize ati “Mu mategeko harimo ikibazo cyo kutihutisha uruhushya rw’abatwara izi ndege, hari ubwo usanga bitinda gato ariko birimo gukemuka. Ikindi ni ugushaka ahantu umuntu akorera igerageza, kuko bisaba kuba ufite ahantu hanini kugira ngo bitabangamira abandi turumva aribyo byakemuka vuba.”

Kugira ngo umuntu yemererwe gutwara drones mu Rwanda agomba kuba afite uruhushya rwerekana ko abifitiye ubushobozi kandi ari hejuru y’imyaka 21, ntigomba kugurutswa muri metero zirenze 100 uvuye ku butaka, ndetse hagati ya drones n’uyigurutsa hagomba kuba harimo metero 300 kandi ntiyemerewe kurenza kilometero 100 mu isaha.

Ubwishingizi ni itegeko k’uyigurutsa, igomba kuba itarengeje ibiro 25 kandi ifite umubare uyiranga watanzwe na RCAA, ntiyemerewe kujya mu kirere kirimo indege, ntigomba kugurutswa muri metero 50 uvuye aho abaturage, amatungo, ibinyabiziga cyangwa inyubako biri. Ntibyemewe kuyigurutsa n’ijoro.

Gusa haracyarebwa uburyo mu Rwanda haba iterambere rya drones nk’igihugu cyaje mu by’imbere muri Afurika mu gutangira kuzikoresha.

Umutekano w’abantu, impamvu yo gutinda gutanga impushya zo kugurutsa drones mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .