Ibi Mukangira yabigarutseho mu muhango wo kwibuka ku nshuro ya 28 Jenoside yakorewe Abatutsi wabaye ku wa 07 Mata 2022, ku bufatanye bwa Ambasade y’u Rwanda mu Buhinde n’ishyirahamwe ry’ubucuruzi hagati ya Afurika n’u Buhinde (India Africa Trade Council).

Ni umuhango witabiriwe n’abagera ku 150, barimo abahagarariye ibihugu byabo mu Buhinde, abayobozi muri Minisiteri y’Ububanyi n’Amahanga y’u Buhinde, abahagarariye ubuyobozi bw’Umujyi wa Delhi, abarimu bo muri za Kaminuza n’amashuri makuru, abacuruzi n’abashoramari.

Uyu muhango wo kwibuka watangijwe no gucana urumuri rw’icyizere ndetse no gufata umunota wo guceceka hibukwa abazize Jenoside yakorewe Abatutsi mu 1994.

Perezida w’Ishyirahamwe ry’ubucuruzi hagati y’u Buhinde na Afurika (India Africa Trade Council) , Asif Iqbal, yagaragaje ibyagendeweho mu rwego rw’amategeko ngo Umuryango w’Abibumbye n’uwa Afurika yunze Ubumwe byemeze Jenoside yakorewe Abatutsi mu Rwanda.

Ambasaderi w’u Rwanda mu Buhinde, Mukangira Jacqueline yagaragaje ubugome ndengakamere Abatutsi bicanwe mu Rwanda.

Ati “Abicanyi bicishaga imihoro, ubuhiri burimo imisumari, abagore batwite bagakorerwa iyicarubozo ndetse bagakurwamo inda basatujwe ibyuma, abahambwaga ari bazima, abana bakicwa bakubiswe ku nkuta ndetse hari n’aho abicanyi baryaga imitima y’abishwe.”

Mukangira yibukije abari bateraniye aho ko Leta yakoze Jenoside yatsinzwe n’Ingabo zahoze ari iza RPA zari ziyobowe na Paul Kagame ari nazo zahagaritse Jenoside yakorewe Abatutsi.

Yavuze kandi no ku mwanzuro w’Umuryango w’Abibumbye wo muri 2014, usaba ibihugu byose gushyiraho amategeko ahana icyaha cya Jenoside, aho yavuze ko ibihugu bidafite amategeko bidashobora guhana abagize uruhare muri Jenoside yakorewe Abatutsi bityo ko ibihugu byose byari bikwiye kuyashyiraho.

Mukangira yagarutse kandi ko umwanzuro w’Umuryango w’Abibumbye wamagana wivuye inyuma ihakana n’ipfobya iryo ari ryo ryose rya Jenoside yakorewe Abatutsi, asaba Ibihugu bigize Umuryango w’Abibumbye gushyiraho gahunda n’imfashanyigisho bizafasha ibisekuru by’ahazaza gukura amasomo kuri Jenoside yakorewe Abatutsi.

Yanasabye kandi Ibihugu gushyiraho inzibutso za Jenoside yakorewe Abatutsi, mu rwego rwo kurushaho gukumira Jenoside.

Yavuze ko u Rwanda rwahisemo ubumwe n’ubwiyunge nk’inzira iganisha ku ituze n’iterambere birambye kandi ko ari igihugu gifite ubukungu burushaho kuzamuka ndetse n’imiyoborere myiza.

Yifashishije urugero rw’ibyamubayeho nk’uwarokotse Jenoside yakorewe Abatutsi ndetse akabura na benshi mu bo mu muryango, yavuze ko yahisemo inzira y’ubwiyunge no kubabarira kugira ngo abashe kurenga akaga yahuye na ko no kurushaho kugira uruhare mu kongera kubaka u Rwanda.

Mu biganiro byahatangiwe byagarutse cyane kuri Jenoside n’amakimbirane byagiye biranga amateka ya muntu mu Isi, ndetse hatangwa umuburo ko hashobora kuzongera hakabaho ibindi bikorwa ndengakamere mu gihe za Guverinoma n’Abanyapolitiki badafashe ingamba zo gukumira amakimbirane agenda agaragara hirya no hino.

Ambasade y’u Rwanda mu Buhinde iteganya ikindi gikorwa cyo kwibuka kizaba ku itariki ya 16 Mata 2022 hifashishijwe uburyo bw’ikoranabuhanga, aho urubyiruko ruzagira amahirwe yo guhabwa ibiganiro bitandukanye kuri Jenoside yakorewe Abatutsi mu Rwanda.

Muri uwo muhango kandi Abanyarwanda batuye mu Buhinde no mu bindi bihugu biganjemo urubyiruko rw’abanyeshuri benshi bavutse nyuma ya Jenoside, bazagira amahirwe yo kuganirizwa bityo bamenye byinshi ku mateka y’u Rwanda.