Leta yashyizeho ibiciro bishya by’inyongeramusaruro

Yanditswe na Twarabanye Venuste
Kuya 13 Nyakanga 2020 saa 08:41
Yasuwe :
0 0

Minisiteri y’Ubuhinzi n’Ubworozi, MINAGRI, yashyizeho ibiciro by’imbuto n’ifumbire bizakurikizwa mu bihembwe bya 2021A, B na C.

Ibihingwa leta izunganira ku mafumbire mu bihembwe bya 2021 A, B na C ni ibigori, ibishyimbo, ingano, soya, umuceri, ibirayi, imyumbati, urutoki, imboga n’imbuto.

Ni mu gihe ibihingwa bizunganirwa ku mbuto muri ibyo bihembwe ari ibigori, ingano na soya.

Abahinzi basabwe gukoresha Smart Nkunganire bagaragaza ingano y’inyongeramusaruro bakeneye no kujya mu matsinda ya Twigire muhinzi.

Abacuruzi b’inyongeramusaruro nabo bagomba gukoresha ikoranabuhanga rya MOPA rishamikiye kuri Smart Nkunganire, mu kurangura izunganiwe na leta.

Ku mbuto y’ibigori ya Hybrid yunganiwe ihingwa mu misozi miremire, ubwoko buzagura menshi ni PAN691 izagura 962 Frw ku kilo naho izagura make ni RHMH1520 na RHMH1601 izagura 453 Frw ku kilo.

Imbuto ya Hybrid ihingwa mu misozi iringaniye no mu bibaya, izagura menshi ni PN53 izagura 1547 Frw ku kilo, iziri ku giciro gito ni RHM104, RHM1402 na RHM1407 zizagura 453 Frw ku kilo.

Imbuto y’ibigori ya OPV izagura 295 Frw ku kilo. Imbuto ya Soya irimo izagura 425 Frw n’izagura 396 Frw naho iy’ingano irimo iri kugura 346 Frw, iya 318 Frw n’iya 426 Frw ku kilo.

Ku bijyanye n’ifumbire yunganiwe; Urée yashyizwe kuri 447 Frw, DAP 480 Frw, NPK 17:17:17 iragura 603 Frw, TSP ni 523 Frw mu gihe MOP igura 481 Frw.

Ayo mabwiriza yashyizweho umukono na Minisitiri w’Ubuhinzi n’Ubworozi, Dr Mukeshimana Gérardine, yibutsa ko umuntu uzafatwa anyereza cyangwa akoresha imbuto n’ifumbire icyo bitagenewe azabihanirwa.

Ibigo bine birimo Yara, ETAG Inputs, Rwanda Fertilizer Company na Tubura nibyo byemerewe gutumiza ifumbire mvaruganda hanze y’igihugu muri gahunda ya Nkunganire no kuyicuruza binyuze mu kigo kigenzura uburyo inyongeramusaruro zunganiwe zigera ku bahinzi (APTC).

Ni mu gihe imbuto zicuruzwa n’ibigo n’abatubuzi b’imbuto z’indobanure 22 bafitanye amasezerano na RAB yo gutubura no gukwirakwiza imbuto muri gahunda ya Nkunganire.

Abahinzi banini bakenera ifumbire irenze ubushobozi bw’umucuruzi w’Inyongeramusaruro ku Murenge bemerewe kujya kuyigurira ku bigo biyicuruza binyuze kuri APTC n’ubuyobozi bw’Akarere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .