Imwe mu mikorere yemejwe ni uko umuryango w’ Abayisilamu uzaba ufite Izina ryamaze kwemezwa, RMC (Rwanda Muslims Community), na bamwe mu bari bafite ijambo muri iri dini bakaba bavanwemo.

Umuryango w’ Abayisilamu mu Rwanda wakunze kuvugwamo ukutumvikana mu buyobozi mu myaka irenga itatu ishize.

Uhagarariye uruhande rw’ abaharaniraga impinduramatwara, Imanzi Fahd, yabwiye Radio IsangoStar ko 99% by’ ibikubiye mu mategeko mashya bisa neza n’ ibyo baharaniye guhera mu mwaka wa 2012 na mbere yaho.

Yavuze ko batangira impinduramatwara bemezaga ko ijambo AMUR ritaberanye n’ idini ya Islam.

Yakomeje agira ati:“Nk’uko twabisabye, nk’ uko twabiharaniye, byahindutse byose, abagize inama nkuru benshi bayirimo cyangwa se hafi ya bose ni abamenyi b’ idini ya Islam. Ndetse n’ abagize inama y’ ubuyobozi, abenshi bayirimo cyangwa se hafi ya bose ni abamenyi b’ idini ya Islam.”

Fahd avuga ko mbere abanyabubasha muri Islam bari bagizwe n’ ibice bibiri, birimo icy’abanyepolitiki b’ abayisilamu n’ igice ngo cyari icy’ abitwa abacuruzi bagaragaraga mu kigega cy’ idini ya Islam, Bayt al-mal.

Yagize ati:“Abanyepolitiki b’Abayisilamu, bari mu nzego za leta, abo ngabo ntibazongera kugaragara, nta n’ ubwo bagaragara muri aya mategeko, ntibazongera no kugaragara mu miyoborere ya hafi usibye ubujyanama mu idini ya Islam."

Ubuyobozi bw’ iki kigega cy’ imari nabwo bukaba bwakuwe mu nama nkuru, ndetse ntabwo bukiri no mu nama y’ ubuyobozi y’ idini ya Islam mu Rwanda.