Diaspora nyarwanda ya Madagascar ku bufatanye na Loni ishami rya Madagasscar bateguye igikorwa cyo kwibuka Jenoside yakorewe Abatutsi. Icyo gikorwa cyitabiriwe n’Abanyarwanda batuye muri Madagascar, abakozi ba Loni, abahagarariye ibihugu byabo muri Madagascar, abakuriye imiryango mpuzamahanga, abakomoka mu bihugu bigize EAC, abenegihugu cya Madagascar n’izindi nshuti z’u Rwanda.

Umuhango wabaye mu cyumweru gishize, watangijwe n’urugendo rwo kwibuka (marche silencieuse/walk to remember), bitwaje ibitambaro byanditseho amagambo yo kwibuka Jenoside yakorewe Abatutsi mu Rwanda n’intego yuyu mwaka igihugu kihaye muri urwo rwego.

Jacqueline Uwamwiza wungirije Perezida wa Diaspora nyarwanda muri Madagascar yasobanuye uko Jenoside yakorewe Abatutsi yateguwe kandi igashyirwa mu bikorwa, uruhare rw’amahanga, ibibazo abarokotse Jenoside bahura na byo, agaruka no ku kibazo cy’abapfobya Jenoside yakorewe Abatutsi.

Madamu Fatme Samura, uhagarariye Loni muri Madagascar, mu butumwa bw’umunyambanga mukuru wa Loni Ban Ki Moon, yahamagariye amahanga gukora iyo bwabaga kugira ngo igikorwa cyo kwibuka kibe icya bose, mu rwego rwo kwigisha kugirirana amahoro n’uburenganzira bwa muntu bwubahirizwe ku isi hose.

Herekanywe kandi filimi ndangamateka igaragaza amateka yagejeje kuri Jenoside n’uko yateguwe igashyirwa mu bikorwa, uruhare rwa bimwe mu bihugu bikomeye, gutereranwa n’amahanga n’imiryango mpuzamahanga, n’ubuhamya bwa bamwe mu barokotse Jenoside yakorewe Abatutsi mu Rwanda, yitwa "Tuez-les tous".

Habaye n’umwanya w’ibiganiro byatanzwe na Oumar Khan, akaba ari we ukuriye ishami Loni rishinzwe uburenganzira bwa muntu ariko akaba yarakoreye mu Rwanda kugeza mu 2011; yatanze ubuhamya ku iterambere ry’u Rwanda nyuma ya Jenoside, yerekana ko akababaro kataheranye Abanyarwanda.

Muhoza Denis, Perezida wa Diasipora nyarwanda muri Madagascar yashimiye abaje kubatera ingabo mu bitugu yibutsa ko kwibuka Jenoside yakorewe Abatutsi ndetse n’izindi Jenoside zayibanjirije, byakagombye kuba inshingano ya buri gihugu na buri wese.