MAGERWA yibutse abari abakozi bayo bazize Jenoside yakorewe Abatutsi

00:00:00 IGIHE NETWORK

KINYARWANDA

ENGLISH

FRANCAIS

MAGERWA yibutse abari abakozi bayo bazize Jenoside yakorewe Abatutsi

Yanditswe na

Rene Anthere Rwanyange

Kuya 7 June 2014 saa 07:17

Yasuwe :

Yavuzweho:

Muri iyi minsi ijana y’icyunamo, ibigo bitandukanye bikomeje kwibuka abazize Jenoside yakorewe Abatutsi muri Mata 1994, no gufata mu mugongo abayirokotse, haterwa inkunga abatishoboye.
Ni muri urwo rwego ubuyobozi n’abakozi ba MAGERWA kuri uyu wa Gatanu tariki ya 6 Kamena 2014, bibutse abari abakozi ba MAGERWA bagera kuri 11 bazize Jenoside yakorewe Abatutsi. Icyo gikorwa cyabimburiwe no gusura Urwibutso rwa Jenoside rw’i Ntarama mu Karere ka Bugesera.
Lambert Nyoni, Umuyobozi Mukuru wa (…)

Muri iyi minsi ijana y’icyunamo, ibigo bitandukanye bikomeje kwibuka abazize Jenoside yakorewe Abatutsi muri Mata 1994, no gufata mu mugongo abayirokotse, haterwa inkunga abatishoboye.

Ni muri urwo rwego ubuyobozi n’abakozi ba MAGERWA kuri uyu wa Gatanu tariki ya 6 Kamena 2014, bibutse abari abakozi ba MAGERWA bagera kuri 11 bazize Jenoside yakorewe Abatutsi. Icyo gikorwa cyabimburiwe no gusura Urwibutso rwa Jenoside rw’i Ntarama mu Karere ka Bugesera.

Lambert Nyoni, Umuyobozi Mukuru wa MAGERWA mu kiganiro na IGIHE yadutangarije ko bafashe umwanya wo gusura Urwibutso rwa Jenoside rw’i Ntarama, mu rwego rwo kwibuka ku nshuro ya 20 Jenoside yakorewe Abatutsi. Agira ati “Twasuye uru rwibutso mu rwego rwo kwifatanya n’ababuriye ababo hano. Hari kandi isomo rikomeye tuhakuye, ku byerekeye Jenoside yakorewe Abatutsi, tugiye kuyisangiza abandi bakozi. Ni umwanya wo kureba aho twavuye, aho tugeze n’aho tugana, duharanira kwiyubaka kugira ngo tutazakomeza guheranwa n’agahinda”.

Nkwakuzi Ignace akora muri MAGERWA kuva ku itariki 19 Ukuboza 1985, icyo gihe akaba yari afite imyaka 22 y’amavuko. Mu kiganiro na IGIHE yadutangarije ko yinjiye muri icyo kigo ari uko yoherejwe n’uwayoboraga ORTPN icyo gihe. Agira ati “Ntiwapfaga kwinjira hano keretse woherejwe; abenshi bari abakomoka muri Gisenyi, hagakurikiraho twe bakomoka mu Ruhengeri, hagataho ab’i Byumba, abandi bari mbarwa”.

Akomeza atangaza ko icyo gihe Abatutsi batari borohewe, kuko batotezwaga. Anatangaza ko uyu munsi bitandukanye cyane, kuko abakozi bose babanye neza ntawe umenya aho undi aturuka, cyangwa ngo arebe ubwoko bwe.

Nirere Charles ufite imyaka 58 y’amavuko yadutangarije ko amaze imyaka 37 akora muri MAGERWA, kuko yatangiye akazi mu 1977. Yadutangarije ko mu gihe cy’intambara yo mu 1990 Abatutsi batangiye gutotezwa cyane, babura amahoro. Ababazwa cyane n’Abatutsi bishwe muri Jenoside. Agira ati “Ni agahomamunwa. Bamwe babwirwaga amagambo akarishye, batotezwa, bicwa urw’agashinyaguro. Byarambabaje kwica umuntu utaremye».

Atangaza ko ashimishwa cyane n’uburyo Abanyarwanda babanye nyuma ya Jenoside, ariko agakebura urubyiruko. Agira ati «Twese tugomba kubana mu mahoro ntihagire ushimishwa no kwambura undi ubuzima kandi atarabumuhaye. Urubyiruko rubibe imbuto y’amahoro kandi ababyeyi na bo batange umurage mwiza».

Urwibutso rwa Jenoside yakorewe Abatutsi rw’i Ntarama rwasuwe n’abakozi ba MAGERWA rushyinguyemo imibiri y’abazize Jenoside yakorewe Abatutsi isaga 5000. Uretse uyu mwaka icyo kigo cyasuye urwibutso rw’i Ntarama, ubusanzwe MAGERWA buri mwaka yifatanya n’imfubyi n’abapfakazi ba Jenoside bo mu Murenge wa Runda mu Karere ka Kamonyi, aho babaha imfashanyo zitandukanye.