Mbabazi yihebeye gufasha abarwayi batishoboye yikoze ku mushahara nta nyungu abitezemo

Yanditswe na Evariste Nsengimana
Kuya 23 Ukwakira 2019 saa 11:20
Yasuwe :
0 0

Abakunze kujya mu bitaro, cyane cyane ibyo mu bihugu bikiri mu nzira y’amajyambere mufite ingero z’abatishoboye mwahabonye, uretse kubura amafaranga yo kwishyura serivisi z’ubuvuzi bahabwa, usanga n’amafunguro abona umugabo agasiba undi, bamwe bagafungura ari uko bagobotswe n’abagiraneza.

Iyi ni imwe mu mpamvu zatumye Teta Mbabazi Nadine, umubyeyi w’abana bane yiyemeza gufasha abarwariye mu mavuriro n’ibitaro n’abana bafite ibibazo by’imirire mibi nta nyungu abitezemo.

Muri Werurwe 2010 nibwo igitekerezo cyo gufasha indembe cyashibutse mu ntekerezo za Mbabazi nyuma yo kwitekerezaho agasanga akwiye kugira icyo afasha abababaye nko gushimira Imana ko abasha kwivuza ndetse akabona ibitunga umuryango we.

Icyo gihe yiyemeje kuzajya atanga ibihumbi 25Frw akuye ku mushahara we ariko anafite icyizere ko azabona abandi bafite umutima ugira impuhwe bafatanya kugira ngo bagoboke ubuzima bw’abarwariye mu bitaro batishoboye, babashe kubona imiti, ibikoresho by’isuku n’ibiribwa.

Ati “Icyo gihe natangiye nyagura imiti nkareba n’abana bafite imirire mibi badafite ibiryo nkamuha 5000Frw yo kugura imiti nkamuha n’andi yo kugura ibiribwa. Ayo 25 000Frw yafashaga abarwayi bari hagati ya batatu na batanu bitewe n’uburwayi bafite.”

Yavuze ko icyo gihe hari ubwo yasangaga mu bitaro hari nk’umubyeyi wabyaye igihe kitaragera akeneye nk’umuti wa 25 000Frw, akayatangira rimwe kuri umwe, bigasaba ko ategereza undi mushahara kugira ngo azafashe abandi.

Uyu mubyeyi nyuma yashatse umukozi amushinga guteka igikoma n’ibiribwa, akabigemurira abarwariye ku bitaro bya Kibagabaga mu Mujyi wa Kigali, yatangirijeho icyo gikorwa bitewe n’ubushobozi, bigahabwa abaharwariye batishoboye.

Yakomeje icyo gikorwa ariko akabona umubare w’abakeneye gufashwa ni benshi, atangira kubikangurira inshuti n’abavandimwe kugira ngo bifatanye.

Ati “Nkabwira inshuti nti ngiye ku bitaro gufasha abarwayi, ati ‘Nanjye ndaguherekeza mfite 5000Frw’. Buri kwezi nahamagaraga abantu, kumwe nkabona ibihumbi 25, ukundi 30 cyangwa 45Frw akagenda yiyongera.”

Pasiteri Cyakwera Denise ukorera mu Itorero Kigali Miracles Center, wiyemeje gufatanya n’uyu mubyeyi, avuga ko yabitewe n’uburyo yagize ibibazo ubwo yabyaraga umwana utageze, akamara amezi atatu ategereje ko akura.

Ati “Nahize umuhigo, mbwira Imana nti nunshoboza nkava aha hantu nanjye nzajya mfasha abandi, nza guhura na Teta turaganira numva turahuje.”

Muri uko kubishishikariza abantu nibwo Mbabazi yaje kwigira inama yo kwegera n’ibigo n’inganda zitandukanye, azisaba gufatanya nawe mu muryango yaje gushinga witwa ‘Jesus Care for Kids’. Icyo gihe yahereye ku kigo cy’itumanaho cya Airtel asanzwe akoramo cyemera gutera inkunga ya miliyoni 1Frw mu 2014.

Ati “Icyo gihe twafashije abana batandatu bahiye bari barwariye muri CHUK kugeza igihe bakize uretse umwe wapfuye. Hari n’urusengero nsengeramo bampaye inkunga y’ibihumbi 700Frw twishyurira abantu babuze ubwishyu, twongeraho ibihumbi 200Frw tubagurira ibiryo.”

Mu bandi bantu bateye inkunga Mbabazi harimo uruganda AIF (African Improved Foods) rukora ubwoko butandukanye bw’ifu zikungahaye ku ntugamubiri guhera muri Werurwe uyu mwaka. Muri rusange AIF imaze guha uyu mubyeyi amakarito 150 y’ifu ya Nootri irwanya imirire mibi.

Uyu mubyeyi ukorera mu Bitaro bya Kigabagaba afite inzozi zo kucyagura kikagera mu bitaro byinshi mu Rwanda kuko hose haba hari abantu batishoboye bakeneye gufashwa mu buryo butandukanye.

Ati “Njye ntuye Kibagabaga niyo mpamvu ariho nahisemo gukorera. Nshaka gushishikariza abantu benshi ngo bagire umutima wo gufasha kuko simbikora njyenyine, nshyiramo amafaranga macye abandi bakamfasha.”

Avuga ko azashishikariza abandi baturiye ibitaro bagafatanya n’abandi gufasha abarwayi, n’uwaba afite 100Frw akaritanga rikagurwa igi rimwe rigafasha umurwayi cyangwa umwana uri mu mirire mibi.

Abagiye bafashwa n’uyu mubyeyi bavuga ko ari igikorwa gikomeye cyane ko abenshi baba bari mu bitaro nta bushobozi bafite.

Uwitwa Uwimana Clarisse umaze igihe arwarijeyo umwe mu bana batanu yabyaranye n’Umunyamahanga [Umurundi] akabata, yagize ati “Naje hano kwa muganga mbura ubushobozi none mbonye bampamagaye ngo bampe agafu k’igikoma cy’umwana nkaba mbashimiye Imana ibampere umugisha.”

Mbabazi avuga ko nibura mu kwezi kumwe abasha gufasha abarwayi bari hagati ya 30-50 kubona imiti, ibiribwa, igikoma n’amafaranga yo kwishyura serivisi baba bahawe n’ibitaro badafitiye ubushobozi.

Abahawe ubufasha na Mbabazi bavuga ko ubuzima butaba buboroheye aho barwariye mu bitaro
Biganjemo ababa bafite abana bamaze igihe barwariye mu bitaro
Bamwe mu babyeyi bafashijwe na Mbabazi kubona ifu y'igikoma ikorwa n'uruganda AIF

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza