Imiterere y’uyu mushinga w’itegeko igaragaza ko abaturage bo muri AU, Commonwealth na Francophonie bakomoka mu bihugu bya Albanie, Algerie, Andorre, Antigua-et-Barbuda, Arménie, Australie, Bahamas, Bangladesh, Barbados, Belize, Belgique, Botswana, Brunei, Burkina-Faso, Bulgarie, Cameroun, Canada, Cap Vert, Cambodge, Comores, Congo (Congo-Brazzaville), Chypre, Djibouti, Dominique, Misiri, Eswatini, Guinée équatoriale, Guyane, Eritrea, Ethiopie, Fiji, u Bufaransa, Gabon, Gambie, Saint Vincent et Grenada, u Bugereki, Guinée-Bissau, u Buhinde, Kiribati, Jamaica, Laos, Liban, Lesotho, Liberie, Libye, Luxembourg, Madagascar, Malawi, Mali, Malaysie, Malta, Mauritanie, Moldavie, Monaco, Maroc, Mozambique, Namibie, Nauru, Nouvelle-Zélande, Niger, Nigerie, Pakistan, Papua-Nouvel-Guinée, Roumanie, Macedonie, Saharawi, Somalie, Afurika y’Epfo, Sudani, u Busuwisi, Togo, Tonga, Tunisie, Tuvalu, Trinidad et Tobago, Sainte-Lucie, Samoa, Îles Salomon, Sri Lanka, Royaume Unie, Vanuatu, Vietnam, Zambie na Zimbabwe, bahabwa viza bageze ku butaka bw’u Rwanda ndetse bakuriweho ikiguzi cyazo kuri viza imara iminsi 30.

Abaturage batazajya bishyura ikiguzi cya viza mu gihe bari gukoresha pasiporo iyo ariyo yose [yaba iya serivisi, isanzwe n’iy’abadipolomate] bageze mu Rwanda ni abakomoka mu bihugu byo mu Muryango wa Afurika y’Iburasirazuba (EAC) ari byo u Burundi, Kenya, Sudani y’Epfo, Tanzanie na Uganda, bo bemerewe kumara amezi atandatu mu gihugu.

Abaturage bemerewe kutishyura viza bakoresha pasiporo isanzwe (Passport Ordinaire) ni abakomoka muri Angola, Benin, Centrafrique, Tchad, Côte d'Ivoire, RDC, Saint Christophe et Nevis, Ghana, Guinée, Indonesie, Haïti, Îles Maurice, Philipines, Sénégal, Seychelles, Sierra Leone, Sao Tomé et Principe, Singapore na Qatar, bo bemerewe kumara iminsi 90 nta kiguzi cya viza batswe.

Hari kandi n’abaturage bakoresha pasiporo z’abadipolomate n’iza serivisi batazajya basabwa kwishyuzwa amafaranga ya viza biturutse ku masezerano ibyo bihugu byagiranye n’u Rwanda cyangwa se icyemezo cyifatiwe n’u Rwanda ku giti cyarwo.

Abo ni abakomoka muri Angola, Benin, u Bushinwa, Centrafrique, Tchad, Côte d'Ivoire, RDC, Djibouti, Ethiopie, Saint Christophe et Nevis, Gabon, Ghana, Guinée, Indonesie, Inde, Israël, Haïti, Îles Maurice, Mozambique, Maroc, Namibie, Philipines, Sao Tomé et Principe, Sénégal, Seychelles, Afurika y’Epfo, Singapore, Turikiya na Leta Zunze Ubumwe za Abarabu, bemerewe kumara iminsi 90.

Abaturage b’ibindi bihugu bitavuzwe bazakomeza guhabwa viza bageze ku kibuga cy’indege kandi bishyure amafaranga asanzwe yishyuzwa hashingiwe ku bwoko bwa viza bakeneye.

Abanyarwanda baba mu mahanga bafite ubwenegihugu bubiri, bemerewe gukoresha indangamuntu mu gihe baje mu Rwanda ndetse nta kiguzi cya viza bazajya bakwa mu gihe bakoresheje pasiporo yo mu mahanga iherekejwe n’indangamuntu y’u Rwanda.

Abanyamahanga bafite uruhushya rwo gutura mu Rwanda, bazakomeza gukoresha ikarita zabo mu gihe bagarutse mu Rwanda kandi bemerewe gukoresha uburyo bw’ikoranabuhanga (Automated Passanger Clearence System) buri ku kibuga cy’indege mpuzamahanga cya Kanombe.

Abana bari munsi y’imyaka 16 bagendera kuri pasiporo yo mu mahaga ariko bari kumwe n’ababyeyi babo bafite indangamuntu y’u Rwanda, nta kiguzi cya viza bazajya basabwa.

Uburyo bwo korohereza abanyarwanda n’abanyamahanga bakora ingendo ziza mu Rwanda ni imwe muri gahunda u Rwanda rushyize imbere mu rwego rwo guteza imbere gahunda ya Visit Rwanda.

Inkuru y’ikurwaho ry’ikiguzi cya viza yakiriwe neza n’abanyamabanga bavuga ko ari icyemezo gikwiye kubera ibindi bihugu isomo mu kwagura ubuhahirane.

Rinajyanye n’imyiteguro y’Inama ya 26 ya Commonwealth Heads of Government Meeting (CHOGM) iteganyijwe kubera mu Rwanda ku wa 22-27 Kamena 2020.

Perezida wa Repubulika Paul Kagame ubwo yakiraga abadipolomate bahagarariye ibihugu byabo n’imiryango mpuzamahanga mu Rwanda ku wa 29 Mutarama 2020, yavuze ko ibyo gukuraho ikiguzi cya Viza bidahagarariye kuri iyi miryango itatu gusa.