Yanditse ati :

Nyuma yo gusoma inkuru mwanditse ku bijyanye n’amazi ava mu birunga ateye impungenge abaturage ba Musanze, mu izina rya MIDIMAR nifuje kubagezaho zimwe mu ngamba zafashwe ndetse zatangiye gushyirwa mu bikorwa mu rwego rwo kugabanya ingaruka ayo mazi agira ku baturage.

Kuva mu kwezi kwa gatanu 2015, nyuma y’imyuzure yibasiye uturere twa Musanze, Nyabihu na Rubavu, hashyizweho itsinda (Technical Team) rihagarariwe n’ikigo cy’igihugu gishinzwe umutungo kamere (RNRA) rishinzwe gushaka ibisubizo birambye ku kibazo cy’amazi ateza imyuzure muri turiya turere.

Iryo tsinda rigizwe na RNRA, RTDA, MIDIMAR, TECOS Company, IWRM team hamwe n’uterere turebwa n’iki kibazo.

Hakozwe isesengura ry’ahibasirwa n’imyuzure hose n’impamvu ziyitera (assessment of floods causes and establishment of mitigation measures), hanafatwa ingamba z’ibikorwa bitandukanye bigomba gukorwa ndetse n’abashinzwe kubishyira mu bikorwa bitarenze mu Ukuboza uyu mwaka. Ubu ibikorwa bimwe byaratangiye.

Mu ngamba zafashwe harimo gusana imihanda no kuvugurura amateme hagamijwe kongera inzira z’amazi kugira ngo abashe gutambuka.

Mu nzira z’aya mazi kandi hari harubatswe inkingi (gabions) zigabanya umuvuduko, ariko kubera ubwinshi bw’amazi, izi nkingi zarasenyutse.

Muri izi ngamba rero hari gukorwa inyigo ku nkingi zishobora kubakwa kandi zifite ubushobozi bwo guhangana n’umuvuduko w’amazi ava mu birunga.

Mu isesengura ryakozwe n’impuguke kandi byagaragaye ko aya mazi ava mu birunga atizwa umurindi n’andi mazi aturuka mu ngo ndetse n’imikoreshereze y’ubutaka, hakaba harafashwe ingamba zo gushyiraho umushinga wo gufasha abaturage batuye muri ako gace gufata amazi ava ku mazu yabo, bahabwa ibigega bibika amazi ndetse bakanigishwa uburyo bashobora gukoresha ubutaka ku buryo bakumira ingaruka z’ayo mazi ava mu birunga.