Minicom yatangaje ko yafashe icyemezo cyo kongera gutangaza ibiciro bikwiye gukurikizwa nyumo yo kubona ko hari abacuruzi bazamuye ibiciro bitwaje ibihe bya Coronavirus, bagendeye ku magenzura bakoze mu Ntara no mu mujyi wa Kigali.

Iyo Minisiteri yasohoye urutonde rw’ibicuruzwa 33 ndetse ishyiraho n’ibiciro bigomba kubahirizwa mu Kuranguza no kudandaza.

Mu biribwa hagaragajwe ibiciro ku bwoko butandukanye bw’umuceri, ibishyimbo, kawunga, amavuta yo kurya, ibitoki, ibirayi, ifu y’imyumbati n’isukari nka bimwe mu byo bamwe mu bacuruzi bari barazamuriye ibiciro.

Ibikoresho by’isuku no kurwanya Covid-19 hagarutswe kuri hand Sanitizer, udupfukamunwa n’impapuro z’isuku abagore bakoresha bari mu mihango z’ubwoko butandukanye.

Mu bikoreshwa mu bwubatsi Minicom yatangaje ko Sima ya Cimerwa y’ibilo 32.5 itagomba kurenza 9800 Frw kuyirangura naho kuyicuruza ikaba hagati ya 10100-10300 Frw naho iy’ibilo 42.5 ikarangurwa 10800 Frw ikagurishwa 11100-11300 Frw.

Sima ya Twiga y’ibiro 32.5 kuyirangura ni 10500-11000 Frw ikagurishwa 11000-11500 Frw naho iy’ibilo 42.5 ikarangurwa kuri 11500-12000 Frw ikagurishwa 12000-12500 Frw.

Minicom iherutse gutangaza ko mu mujyi wa Kigali honyine hamaze guhanwa abacuruzi n’ibigo by’ubucuruzi 266 baciwe amande angana na 36 760 000 Frw guhera tariki ya 17 Werurwe 2020.

Bazira kurenga ku mabwiriza ya Minicom yo kwirinda kuzamura ibiciro, kumanika ibiciro ahagaragariza abaguzi, kwirinda gutanga inyemezabuguzi zidahwanye n’ibyaguzwe, no kwirinda gukoresha iminzani itujuje ubuziranenge no kwirinda gucuruza ibyarengeje igihe.

Itangazo ryerekeye ibiciro bishya by'ibicuruzwa ku masoko atandukanye: pic.twitter.com/dGQptTh9hq

— Min of Trade |Rwanda (@RwandaTrade) July 24, 2020