Kuri uyu wa Gatatu, tariki ya 31 Gicurasi 2017, nibwo intore 416 ziturutse mu mirenge yose y’igihugu zirimo abakobwa 127 n’abasore 289, zari zimaze ukwezi ku "Rugerero rukambitse" mu Kigo cy’Ubutore cy’i Nkumba mu Karere ka Burera zasoje amsomo zahabwaga.

Iri torero ryari rifite intego eshatu zirimo gutozwa gufasha bagenzi babo gukora neza urugerero no gukurikirana neza imirimo yarwo mu tugari; kumenyerezwa gukoresha amaboko no kubaka nk’Umunyarwanda ukunda igihugu n’umurimo ufite uburere n’indangagaciro nyarwanda.

Nyuma y’amasomo y’uburere mboneragihugu zahawe, intore zubatse inzu 11, ibikoni, imisarane, uturima tw’igikomi n’ibiraro by’amatungo mu Murenge wa Kinoni n’uwa Gahunga yo muri Burera. Ibikorwa byakozwe mu minsi 21.

Mu muhango wo gusoza iri torero, Minisitiri Kaboneka yashimiye izi ntore zitojwe mu cyiciro cya mbere cy’Urugerero rukambitse, ashimangira ko imikorere yazo itanga icyizere cy’u Rwanda rw’ahazaza.

Yagize ati “U Rwanda rwavuye kure kandi aho tugeze ni heza ariko ntituragera aho twifuza. Kubera ibi bikorwa byanyu, igihugu kibafitiye icyizere kandi muri igisubizo ku bibazo byacyo. Ntimuzapfushe ubusa amahirwe mufite uyu munsi ahubwo nimuyakoreshe mwiteza imbere.”

“Kuba mwubakiye umukecuru w’umunyarwandakazi mutazi bifite agaciro cyane kuko nubwo yasaza, yagenda avuga ko asize u Rwanda ruzima kandi rwiza. Mwigishe kandi mutoze urundi rubyiruko rutaragira iyo myumvire. Muri imfura mu ntore z’urugerero rukambitse; imfura ziravunika cyane kuko ababyeyi baba bataramenyera kurera abana, ni zo zitumwa, ni zo zisabwa kwita kuri barumuna bazo…, ariko mwe nk’imfura zo ku rugerero rukambitse, ubuyobozi bw’u Rwanda buzabafasha ngo mutavunika.U Rwanda rurashaka Umunyarwanda wanga umugayo, ukunda igihugu, wumva nta kintu yageraho adakoranye n’abandi.”

Intore zahawe impamba y’ingingo 15 zizagenderaho mu gukora Itorero ry’Igihugu ku Mudugudu.

Abitabiriye icyiciro cya mbere cy’Urugerero rukambitse batoranyijwe mu mirenge 416, harebwa uwagize amanota ya mbere ndetse n’uwitabiriye neza ibikorwa by’urugerero rwo ku kagari.

Intore z’Urugerero rukambitse zihagarariye izindi ntore ibihumbi 54 ziri ku rugerero mu tugari tw’u Rwanda mu gihe zitegereje gukomeza amasomo ya kaminuza n’ubundi buzima.

Minisitiri Kaboneka yijeje intore zizakomeza gukora neza kuzazamurwa mu ntera zigatera indi ntambwe yisumbuye kugira ngo zikomeze guteza u Rwanda imbere.

Itorero ry’Igihugu ryitabiriwe n’intore zo ku rugerero rukambitse ryari rigizwe n’abanyeshuri barangije kwiga amashuri yisumbuye mu 2016

Minisitiri w'Ubutegetsi bw'Igihugu, Francis Kaboneka aha imbanuro intore zivuye ku 'Rugerero rukambitse’

Urubyiruko rwakoze imirimo y'amaboko rwubakira abatishoboye

Hagiye hubakwa n'ibiraro