Minisitiri w’Ubutegetsi bw’Igihugu Francis Kaboneka yasabye abayobozi b’inzego z’ibanze kunoza inshingano ziremereye zo gukorera abaturage bahawe, bagatandukanya kwitiranya izi nshingano no guhabwa imbehe.
Mu nama n’abayobozi b’inzego z’ibanze bo mu Ntara y’Amajyepfo kuwa kane tariki ya 2 Ukwakira 2014, Kaboneka yavuze ko atemeranya n’abavuga ko iyo umuyobozi avanwe ku mwanya runaka aba yubikiwe imbehe.
Yagize ati “Imyanya abayobozi barimo ntigomba gufatwa nk’imbehe nk’uko bamwe babivuga, ahubwo ni inshingano ziremereye zo kwegera abaturage no kubakemurira ibibazo. Nta muyobozi w’ingabo wishima agiye ku rugamba. Ubundi iyi myanya tujyamo tuba tugiye ku rugamba, tukazishima twushije ikivi.”
Yongeyeho ko imyumvire y’aba bantu idakwiye kuko ari yo ivamo amakosa yo kunyereza imitungo no kutuzuza inshingano.
Ati “Nibyo biza kuvamo bya bindi ngo yongeye yariye; yava ku mwanya ngo bubitse imbehe. Iyo mico yo kongera kurya no kubika imbehe, bayobozi mureke tuyikuremo, izi nshingano turimo si ukurya, ni ukuvunika, ni ukwitanga.”
Kaboneka yakanguriye aba bayobozi kurushaho kwegera abaturage, ntibigombere guharirwa ukwezi kwahariwe imiyoborere ahubwo bikaba umuco n’ibanga ryo kwesa imihigo.
Iyi nama yari yitabiriwe n’abayobozi b’imidugudu bari bahagarariye abandi, abakuru b’utugari bose, ab’umurenge n’abayobozi b’uturere n’abandi batandukanye bo mu ntara y’Amajyepfo.
Hejuru ku ifoto: Minisitiri Kaboneka
TANGA IGITEKEREZO