Minisitiri w’Intebe ucyuye igihe, Dr Pierre Damien Habumuremyi yahererekanyije ububasha na Minisitiri w’Intebe mushya, ashimira Perezida Kagame wamuhaye uyu mwanya, asaba umusimbuye kutagira ubwoba mu gushakira Abanyarwanda icyiza.
Mu biro bye bishya ku Kimihurura, Minisitiri w’Intebe Anastase Murekezi yashyikirijwe inyandiko zitandukanye zibarizwa mu biro by’Umuyobozi wa Guverinoma n’ububasha yemererwa n’itegeko.
Imbere y’abakozi bo mu biro bya Minisitiri w’Intebe n’ibigo biyishamikiyeho, Dr Habumuremyi yafashe akanya asaba imbabazi uwo baba baragonganye mu kazi n’ubwo yavuze ko yabikoreraga kugirango akazi kagende neza.
Dr Habumuremyi yatangiye ashimira Umukuru w’Igihugu wamugiriye icyizere kuko kuva mu myaka 20 ishize yagiye ahabwa akazi mu bigo bitandukanye kugeza ageze ku mwanya ukomeye wo kuba Minisitiri w’Intebe.
Yagize ati “Ndashimira Umukuru w’ Igihugu wampaye kandi kenshi ntabwo ari rimwe kuva mu 2000. Kuba Minisitiri w’ Intebe mwese murabibona ni iby’agaciro gakomeye, kumufasha gutanga umusanzu wo gukorera igihugu mu rwego rw’ikirenga. Ntamushimiye naba ndi ikigwari.”
Yakomeje ashimira guverinoma bakoranye, abikorera, inzego z’ibanze, amadini, , abafatanyabikorwa, sosiyete sivile n’Itangazamakuru bafashije guverinoma yari ayoboye kugera ku byagezweho.
Yagarutse kandi yishimira ubufasha yahawe n’ishyaka rya RPF. Ati “[FPR] yambaye hafi ikangira inama nyinshi igatuma guverinoma nari nyoboye igera kuri byinshi”.
Yashimiye ubwitange, umurava n’ubushishozi biranga Minisitiri w’Intebe mushya, amusaba kutagira ubwoba agahangana n’icyo ari cyo cyose cyasubiza cyangwa kigashaka gusubiza inyungu z’igihugu inyuma.
Yanamushimiye ikipe y’abakozi bakora mu biro bye ko ari abakozi beza b’abanyabwenge bagira umurava, amwizeza ko bazamugeza kuri byinshi no gusohoza inshingano ze.
Minisitiri w’Intebe mushya, Murekezi Anastase yashimiye Perezida Kagame wamutoreye kuba Minisitiri w’Intebe, akamushinga akazi gakomeye, ariko yongeraho ko yizeye ubufasha azamuha ngo abashe kugasohoza.
Yavuze ko mu myaka 20 u Rwanda rumaze kugera kuri byinshi byerekana ko abaminisitiri b’intebe bamubanjirije bakoze, avuga ko babigezeho bafatanyije n’Abanyarwanda na Perezida Kagame utanga impanuro n’imbaraga zo gukora.
Yabwiye uwo asimbuye n’abo bafatanyije ati “Ibyo mwakoze hari aho mwabigejeje niko bihora bigenda intambwe iza iterwa ku yindi (…), indi ntambwe izahora ikenewe aho mugejeje niho tugiye guhera mu bikorwa bikomeye byo guhuza imirimo y’abaminisitiri ngo dushyikirize Nyakubahwa Perezida wa Repubulika gahunda zinoze, ibikorwa binoze, akomeze atuyobore mu cyerekezo kiza yahaye igihugu".
Yavuze ko abavuye muri iyi guverinoma bakoze neza kandi uruhare rwabo rugaragara baba abazahabwa imirimo mishya cyangwa abazikorera.
Reba amafoto yose y’ihererekanyabubasha hagati ya Dr Habumuremyi na Minisitiri w’Intebe Murekezi
[email protected]
TANGA IGITEKEREZO