Umuvugizi wa Polisi mu Ntara y’Uburasirazuba, Inspector of Police (IP) Emmanuel Kayigi, yagize ati “ Kuwa 11 Werurwe nibwo twamenye amakuru ko hari moto yari yibwe mu Mujyi wa Kigali ikaza kugurishirizwa mu Bugesera, nibwo twatangiye kuyishakisha.”

Yakomeje agira ati “Hari abamotari batubwiye ko iyo moto bayibonye mu Kagari ka Kayumba mu Murenge wa Nyamata, nibwo natwe twahise twoherezayo abapolisi ngo bajye kuyihashakira ari nabwo bahise bayihafatira.”

Minani w’imyaka 33 wafatanywe iyi moto akomoka mu Murenge wa Rwabicuma, mu Karere ka Nyanza mu Ntara y’Amajyepfo kuri ubu afungiye kuri Sitasiyo ya Polisi ya Nyamata mu gihe iperereza rikomeje ngo barebe niba hari abandi bantu baba bari inyuma y’ubu bujura.

Kuri iyi ngingo, IP Kayigi yavuze ati “Iperereza ryagiye rikorwa ku bujura nk’ubu bwabaye mu bihe bishize, ryerekanye ko nta muntu wishora muri ibi bikorwa ari umwe wenyine.”

Ubwo iyi moto yasubizwaga nyirayo, IP Kayigi yashimiye imikoranire myiza iri hagati ya Polisi y’u Rwanda n’abamotari bakorera mu ntara y’Uburasirazuba binyuze mu kuyiha amakuru mu gihe hari ibikorwa by’ubujura cyangwa ibindi byaha byahungabanya umutekano.

Mu byumweru bishize na none, Polisi ikaba yarafashe moto ebyiri zari zibwe mu Rwanda zigiye kugurishirizwa mu Burundi.