00:00:00 IGIHE NETWORK KN KINYARWANDA EN ENGLISH FR FRANCAIS

Ibisobanuro bya FARG ku bari bacumbikiwe muri ‘One Dollar Campaign’ bagabanye amafaranga y’inkunga bakaburirwa irengero

Yanditswe na Kanamugire Emmanuel
Kuya 16 Nzeri 2021 saa 09:26
Yasuwe :
0 0

Umugenzuzi Mukuru w’Imari ya leta, yagaragaje ko myinshi mu mishinga y’Ikigega Gishinzwe gutera inkunga abarokotse Jenoside yakorewe Abatutsi batishoboye, FARG, itageze ku ntego, irimo n’uw’abatujwe mu nyubako ya ‘One Dollar Campaign Project’, bagabanye amafaranga y’inkunga bahawe mu matsinda, none ubu bikaba bitazwi aho baherereye.

Ibi byagarutsweho ubwo Komisiyo y’Inteko Ishinga Amategeko Ishinzwe Gukurikirana Imikoreshereze y’Imari n’Umutungo by’Igihugu, PAC, yumvaga ibisobanuro by’ubuyobozi bwa FARG kuri iyi ngongo, ku wa Gatatu, tariki 14 Nzeli 2021.

Hagaragajwe ko imicungire y’amafaranga yahawe amatsinda ane agizwe n’ababaga mu icumbi rya “one-dollar campaign project (ODCP)” yabayemo intege nke.

Ubugenzuzi bwagaragaje ko FARG yateye inkunga ingana na 81.000.000 Frw amatsinda ane agizwe n’abagenerwabikorwa 81 babaga mu icumbi rya “one-dollar campaign project (ODCP)”.

Abagenerwabikorwa babanje guhabwa icyiciro cya mbere kingana na 48.600.000 Frw andi bakazayahabwa nyuma babanje kugaragaza uko bakoresheje aya mbere.

Ubwo habaga ubugenzuzi muri Gashyantare 2021, bwagaragaje ko hari amatsinda abiri yahawe amafaranga angana na 12.600.000 Frw kuri rimwe n’andi 12.000.000 Frw ku rindi tsinda ariko ntiyakora.

Habayeho no gutinda gutangira gushyira mu bikorwa imishinga ifite agaciro ka 12.000.000 Frw ku itsinda rimwe muri 4 yahawe amafaranga aho byagaragaye ko batangiye kuwushyira mu bikorwa hashize amezi 8 uhereye igihe baherewe amafaranga.

Muri iyi raporo itsinda rimwe kuri ane ryahawe 12.000.000 Frw, abanyamuryango barayagabagabanye aho kuyakoresha umushinga buri wese yigira mu bye.

Umuyobozi Mukuru wa FARG, Uwacu Julienne, yasobanuye ko abagabanye ayo mafaranga bari barakoze imishinga yo gucuruza imyaka.

Mu kubakurikirana FARG yagiranye amasezerano na GAERG nk’umuryango uhuriza hamwe abarangije amashuri bahoze muri AERG kugira ngo bagirwe inama.

Ku bagabanye amafaranga, Uwacu yavuze ko byamenyekanye ari uko bagiye gusura imishinga yabo bareba aho abageze bayishyira mu bikorwa kuko basabaga guhabwa icyiciro cya kabiri cy’inkunga.

Ati “Bakomezaga kutubwira ko bakora tugiye kubasura dusanga ibyo bakora bidafatika bituma twirinda kubaha 40% yari asigaye. Ku mpamvu zatumye bdakora nk’uko bikwiye harimo ko bamaze gutandukana buri wese yagiye kuba aho yatekerezaga ko ubuzima bwamworohera.”

Depite Mukabalisa yavuze ko hagombye kuba harabayeho ingamba zo kurinda ko amafaranga atangwa agapfa ubusa no gukurikirana abayahawe umunsi ku munsi.

Umuyobozi Ushinzwe gukurikirana ibikorwa muri FARG, Munyangondo Emmanuel, ati “Aba bagenerwabikorwa twarabakurikiranye turabasura, bamwe turababona abandi turababura. Hari uwatanze ibyangombwa avuga ko akorera mu Karere ka Ruhango mu Murenge wa Ntongwe, twagiye kumusura, tugahaguruka tumuhaye gahunda, twahagera telefone akayikuraho.”

Perezida wa PAC, Muhakwa Valens, yamubajije ati “Kubura abantu mu Rwanda…ubwo se mwababuze mute? Mwahaye umuntu misiyo aragaruka arababwira ngo nababuze?”

Mukabalisa Germaine yagize ati “Ntabwo byumvikana ukuntu watanga amafaranga 60% by’umushinga utazi aho umuntu ari, wajya kureba uko awushyira mu bikorwa akaburirwa irengero! Cyangwa mwarayibwe.”

Umuyobozi Mukuru wa FARG, Uwacu Julienne, yatanze ibisobanuro kuri PAC hifashishijwe ikoranabuhanga ry'amashusho rya WEBEX

Indi mishinga FARG yateye inkunga ntiyageze ku ntego

Ubugenzuzi bwagaragaje ko hagati y’umwaka wa 2012/2013 FARG yohereje Frw 1.076.000.000 mu Turere dutandukanye yo gutera inkunga amashyirahamwe 1.065 akora imirimo ibyazwa inyungu mu Mirenge itandukanye mu gihugu hose.

Mu ishyirwa mu bikorwa ry’iyi gahunda hagaragaye ibitaragenze neza birimo kutagaragaza aho ishyirwa mu bikorwa ry’imishinga rigeze.

Umubare munini w’imishinga yatewe inkunga yarahombye aho imishinga 393 ifite agaciro ka 325.400.000 Frw ingana na 37% y’imishinga yose yatewe inkunga ntabwo yakozwe aho muriyo 35 ifite agaciro ka 27.700.000 Frw hatagaragajwe icyatumye idakorwa naho imishinga 157 ifite agaciro ka 146.100.000 Frw ntiyakoraga neza.

FARG kandi yatanze amafaranga angana na 49.500.000 Frw yo gufasha gukora imishinga 99 mito ibyara inyungu aho buri umwe wabaga ugenewe angana na 500.000 Frw.

Mu ishyirwa mu bikorwa ry’iyi mishiga hagaragaye intege nke aho imishinga 25 kuri 73 yasuwe n’abagenzuzi, byagaragaye ko itagikora bitewe n’impamvu zitandukanye zirimo abarwaye ntibabashe gukora, abakoresheje amafaranga mu bibazo by’imiryango n’ibindi.

Abagenzuzi basanze hari abagenerwabikorwa bahinduye imishinga batabyemerewe na FARG aho 15 bahawe angana na 7.500.000 Frw bahinduye imishinga.

Hari ukutagaragaza imishinga yabashije kubika 10% y’inyungu aho imishinga 43 kuri 73 bingana na 59% yasuwe n’umugenzuzi ikora neza ariko ntabwo hagaragajwe amafaranga babika y’inyungu angana na 10%.

Amafaranga yakoreshejwe nabi FARG itarabasha kugaruza

Ubugenzuzi buheruka bwakozwe ku mwaka warangiye tariki 30 Kamena 2019, bwari bwagaragaje amafaranga angana na 358.434.000 Frw yatanzwe na FARG yo gufasha imishinga ibyara inyungu yakoreshejwe nabi yagombaga kugaruzwa ariko ubwo hongeraga kuba ubugenzuzi muri Werurwe 2021, ubugenzuzi bwagaragaje ko ayo mafaranga ataragaruzwa nubwo hari urutonde rw’abayakoresheje nabi rwamaze gushyikirizwa RIB ngo ifashe FARG kubakurikirana.

Umuyobozi wa FARG, Uwacu Julienne, yavuze ko amafaranga yari agenewe gushyira mu bikorwa imishinga y’abarokotse jenoside batishoboye, bayahawe mu matsinda abanje kugaragaza ibyo agiye gukora.

Hari abagaragaye ko bakoze ibyo batari bagaragaje n’imishinga yatewe inkunga idahari, hari abakurikiranwe bamwe bagenda bayagarura abandi batinda kuyasubiza.

Mu bahawe amafaranga mu 2012/2013 bagombaga gukurikiranwa bagatera intambwe ku buryo yagera no ku bandi ariko ngo hari aho bitakozwe.

Depite Niyorurema Jean Rene yavuze ko abagenerwabikorwa bahabwaga amafaranga nta mahugurwa bahawe bikaba ari byo bishobora kuba byaratumye nta cyo abamarira.

Uwacu yavuze ko amahugurwa yabayeho mbere y’uko bahabwa amafaranga hagendewe ku byiciro bitandukanye ku bufatanye n’inzego z’imirenge.

Depite Mukabalisa Germaine yavuze ko abagenerwabikorwa ba FARG atari bo bonyine bashyirwaho uruhare mu guhomba kw’iyi mishinga ahubwo n’abari bafite inshingano zo kubakurikirana batazujuje.

Ati “Imishinga 37% iyo ihombye; 25 kuri 73 igahomba, twicare hano twemeze ko abagenerwabikorwa ba FARG ari bo kibazo? Ku ruhande rwacu twumve ko ibintu bitunganye tubihe umugisha, tuvuge ko abagenerwabikorwa ari bo babyitwayemo nabi? Igisobanuro ndumva cyagorana, bakomeze bagerageze ariko bava muri iyo nzira bari batangiye.”

Visi Perezida wa PAC, Uwineza Beline ati “Akwiye kutubwira uruhare rwa FARG, Uturere, imirenge n’abafatanyabikorwa mu kudakurikirana ibikorwa. Bikomeje gutya byaba ari aka ya mvugo ko amafaranga yapfuye ubusa n’abayahawe ntabagirire akamaro.”

Uwacu Julienne yasubije ati “FARG dufitemo uruhare tudashobora guhunga kuko iyo biza kugenda neza amafaranga abagenerwabikorwa bahawe bakayakoresha akabafasha guhindura imibereho yabo twari kubatugeze ku ntego ikigega cyahawe kuva gishyizweho. Hari uruhare rwacu n’urw’abo dufatanya.”

Yavuze ko FARG kimwe n’inzego z’ibanze nk’imirenge aho amafaranga yatangiwe batabashije gukurikirana ishyirwa mu bikorwa ry’imishinga ariko ko hari n’abamaze gushyikira amafaranga bakayikenuza aho gukora ibyari biri mu masezerano.

Inyubako y'Umushinga wa 'One Dollar Campaign' icumbikiye imfubyi za Jenoside yakorewe Abatutsi badafite imiryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .