Mu ijambo rye, Dr Bideri Diogène Umujyanama mu by’amategeko wa CNLG wari umushyitsi mukuru muri uwo muhango wabaye ku mugoroba wo ku wa 27 Gicurasi 2016, yagaragaje ko ubuyobozi bwiza buriho bushishikariza abanyarwanda kubana mu mahoro kandi ari bwo buryo bwiza bwo kubaka igihugu.
Ati “Si byiza gukomeza kuba babi, tugire urukundo, icyo ukoze cyose ntugikore mu izina ry’ubuhutu cyangwa izina ry’ubututsi, ahubwo ukagikorera abanyarwanda utarobanuye.”
Umuyobozi Mukuru w’Ikigo cy’Igihugu cy’Ubwiteganyirize, RSSB Jonathan Gatera,mu ijambo rye yagarutse kubahakana bakanapfobya jenoside, asaba buri wese kuba umunyarwanda nyakuri udakorera ku jisho.
Yagize ati “Abahakana bakanapfobya jenoside si abo hanze y’igihugu gusa ahubwo n’imbere mu gihugu barahari, ni byiza ko icyo dukora cyose mu kubaka igihugu tugikora kuko kiturimo nk’abanyarwnda atari ukugira ngo badushime.”
Yakomeje agaragaza ko kwibuka bikwiye kuba intwaro ituma buri wese aba intangarugero mu mibanire ye n’abandi bikaba umurage nyakuri wa buri wese.
Mu buhamya bwatanzwe n’umwe wari ufite umubyeyi wakoraga muri CSR akaza kwicwa mu 1994, yasabye abakoze jenoside gusaba imbabazi babikuye ku mutima kuko aribyo nabo bibafasha gukira ibikomere no kwicyeka
Umuyobozi w’Inama y’Ubutegetsi ya RSSB,Dr Gakwaya Innocent yasabye buri wese guhora azirikana agaciro abazize jenoside bambuwe kandi agaharanira gukora neza ngo jenoside ntizasubire ukundi mu Rwanda n’ahandi.
Umuhanzi Mariya Yohana yatanze ubutumwa mu ndirimbo ku bitariye uwo muhango wo kwibuka barushaho kumva neza impanuro binyuze mu ndirimbo zo kwiyubaka no gukomera.
Ibitekerezo 0