Abanyeshuri biga mu mashuri yisumbuye b’abakene basaga 840 bafashwa n’ibiro mbonezamubano mu iterambere (Bureau Social de Développement-BSD) biyemeje kurushaho kwitwara neza mu mwaka wa 2014 ngo bizatume bisubiza agaciro k’ubuzima bubategereje. Ibi babyiyemereje mu biganiro bagiranbagirana na BSD bigamije gufatira hamwe ingamba z’umwaka w’amashuri wa 2014.

Muri ibi biganiro byafashaga no kumenyana hamwe no gusangira ubuzima, abanyeshuri basabwe kwita ku masomo yabo bakiga bagamije kugira icyo bageraho, no kwitwararika igituma bakwandagara bakakirwanya. Aha hatanzwe ingero ku bana b’abakobwa bakwitwaza amikoro make bigatuma bashukwa bakajyanwa mu ngeso mbi nk’ubusambanyi n’izindi.

Prudence Karamira nk’Umunyamabanga Nshingwabikorwa wa BSD, yavuze ko icy’ibanze ari umusaruro n’imyitwarire myiza kuko ari ryo pfundo ry’ubuzima bwiza nyamara ariko binyuze mu nkingi y’uburezi.

Berekana ko badahatirizwa ahubwo bazi icyo basabwa n’akamaro kacyo, bamwe mu banyeshuri nka Kubwimana Hodali na Umukesha Evase batangarije IGIHE ko gushimira umufasha wabo mu buryo bw’uburezi biyemeje kubinyuza mu gutsinda bakerekana umusaruro ushimishije uruta uwo basabwa w’amanota 65%; kuko bo bivugira ko batayaziritsweho ahubwo bazahora ari intarushwa n’imparanirashema mu gutsinda.

Umukesha ati : « twiyise intarushwa kuko tutabwirizwa gutsinda tugomba gutsinda tugaharanira kujya imbere mu mvugo tubwirwa tuyisanishe n’ingiro dutsinda».
Uretse ubufasha bw’amafaranga y’ishuri bahabwaga, Ibiro mbonezamubano mu iterambere (BSD) bibagenera n’ubwisungane mu buzima.