Abanyarwanda bagira uburyo butandukanye bw’umwimerere wabo bwo gukora ibintu cyangwa gukemura ibibazo runaka mu buzima bwabo. Nubwo bimwe mu byo bakoraga bisigaye bifatwa nk’ibya gipagani kubera abenshi muri bo bahindutse Abakirisitu, mu Karere ka Muhanga, Umurenge wa Nyabinoni ho bavumbuye uburyo bwo gucubya inkono bakoresheje imitongero.

Iyi mitongero ikunda gukoreshwa cyane cyane iyo batetse ibishyimbo. Abateka cyangwa abamenyereye imirimo y’igikoni basanzwe bazi ko iyo bateste ibishyimbo mu nkono ipfundikiye hari igihe bibira kubera umwuka uba utari gusohoka neza.

Uburyo bwari busanzwe bwo gukemura ibi kibazo ni ugupfundura iyo nkono, ubundi umwuka ugasohoka kubira bigahagarara.

Nk’uko twabitangarijwe na bamwe mu baturage baturiye Umurenge wa Nyabinoni, ahitwa i Shaki, bo ngo bavumbuye uburyo bushya bwo gucubya iyo nkono ibira batiriwe bayipfundura. Nubwo bamwe batemera ko iyi mitongero ikora, abandi bemera ko koko iyo bayikoresheje ikora neza.

Umugore witwa Nyiraneza, ufite imyaka 48 yatubwiye uburyo babikora. Ngo iyo ibishyimbo bitangiye kubira bafata umuyenzi cyangwa umuravumba bagashyira muri iyo nkono barangiza bakagerekaho imitongero igira iti ’’ Ba gito ba gito nka runaka’’.

Uwo runaka ngo ni izina ry’umuntu uwo ari we wese uba uzwiho kuba gito mu gace uri kuvuga iyo mitongero atuyemo.

Bitewe n’uko uko abantu baturanye batabona ibintu kimwe, ngo ushobora gusanga runaka navuze mu mitongero yanjye atandukanye n’uwo wavuze mu yawe.

Abo baturage bemeza ko kandi ngo nta muntu udakoresha iyi mitongero. Usibye abatabyemera, baba Abakirisitu cyangwa abandi, undi mugore witwa Mukantabana Generose ufite imyaka 55, avuga ko ngo n’Abakirisito bemera ko iyo mitongero ikora nabo bayikoresha, kandi ngo bakumva nta cyaha kirimo, dore ko nawe ubwe yatwemereye ko ari Umukirisito.

Ntabwo aba baturage bashoboye kutubwira neza inkomoko y’iyi mitongero bemeza gusa ko byagiye bikwirakwira mu baturanyi babihanahana mu minsi ishize.

Niba aba baturage bemeza ko iyi mitongero ikora koko, ntawabura gukora ubushakashatsi bwa gihanga kumenya niba ari imitongero icubya inkono ikayibuza kubira, cyangwa se niba ari ibituruka mu miyenzi cyangwa mu muravumba byaba gira icyo bihindura ku bushyuhe buba buri muri iyo nkono.