00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Abongerera agaciro amakoro basabye kudohorerwa ku gutanga amahoro

Yanditswe na Claude Bazatsinda
Kuya 10 August 2022 saa 01:17
Yasuwe :

Bamwe mu bakora umwuga wo gutunganya amakoro bakayakuramo ibikoresho byo kubakisha bo mu Karere ka Musanze, bavuga ko kuba ibikomoka ku makoro bigihenze ahanini bituruka ku kuba bakibangamiwe n’umusoro bakunze gusoreshwa inshuro nyinshi bigatuma n’ibyo bakora bihenda.

Umusoro bavuga ko ubabangamiye ni aho usanga basora igihe cyose bamaze gucukura amakoro bakayikoreza imodoka bayajyana ku nganda ziyatunganya, umusoro utangwa ku mashini ziconga ayo makoro zikayakuramo amatafari n’amabuye meza yubakishwa n’umusoro batanga iyo buri kintu cyose kivuye mu ruganda kigiye ku isoko.

Ibi byose byongera igiciro ku bikoresho by’ubwubatsi baba bakuyemo hakiyongeraho uburyo bugoye kubigeraho, ubwiza n’uburambe bwabyo, kuba bitaramenyekana cyane no kuba abantu bataritabira kubyubakisha isoko rikaba rito bigatuma bigera ku isoko bihenze ntibyigonderwe na benshi.

Nyirinkindi Aimé Ernest utuye mu Karere ka Musanze mu Murenge wa Kimonyi, yagize ati “Iyo urebye usanga ibikoresho byacu iyo bikoreshejwe mu bwubatsi biramba cyane kuko ikoro uko rimara iminsi niko inyubako ikomera ndetse rikagenda risa neza ku buryo inyubako yamara n’imyaka 150, hari abagenda batugana tukabakorera ariko usanga dukunze gukomwa mu nkokora no kuba usanga bigihenze tukabura abakiliya kandi ahanini bituruka ku musoro ukiri hejuru.”

Yongeyeho ko “Ikoro risora tukiricukura kugeza rigeze ku isoko bikiyongeraho n’aho tuyakura usanga hangiza imodoka, gusorera imashini dukoresha tuyaconga n’umuriro bigihenze bigatuma igiciro kiyongera, turasaba ababishinzwe ko badukorera ubuvugizi uyu musoro ukagabanya natwe tugakora ibishobora guhiga iby’abandi ku isoko kandi biramba."

Ishimwe Aimé na we ufite uruganda rutunganya amakoro rukayakuramo amatafari, amapave n’andi mabuye mato byubakishwa, uvuga ko akibangamiwe n’umusoro utangwa ku mashini bifashisha baconga ayo mabuye.

Yagize ati “Imashini twifashisha duconga amabuye tuzisorera amafaranga menshi kuko njye nsoreshwa arenga ibihumbi 150 ku kwezi kandi hari igihe usanga hari imashini ziba zidakora zikamara nk’amezi ane zarapfuye ariko ukaba ukizisorera kuko babara umubare wazo gusa batitaye ku zishobora kuba zitari gukora kubera ibibazo zigira. Turasaba ko uyu musoro wakwigwaho kuko bituma ibikoresho bihenda."

Abo banyenganda bavuga ko n’ubwo bagifite izo mbogamizi z’amahoro agihanitse n’ibindi, uyu ari umwuga ubateza imbere atari bo gusa ubwabo ahubwo no ku bakozi babo n’igihugu uri rusanze.

Umuyobozi w’Akarere ka Musanze, Ramuli Janvier, avuga ko ibibazo byagaragajwe n’aba batunganya amakoro bakayakuramo ibikoresho by’ubwubatsi babyizeho bakabishakira ibisubizo birimo no gukuraho umusoro wajyaga utangwa ku mashini bifashishaga.

Yagize ati “Ibibazo bagaragaje twabyizeho ariko hari abo usanga amakoro batunganya bayakura hirya y’aho imashini zabo zikorera noneho bagasora umusoro w’ubwikorezi kandi uwo aba ari ngombwa, ariko abafite ibirombe aho bakorera bo uwo musoro ntabwo uba ubareba. Umusoro twabakuriyeho ni uwo bajyaga batanga ku mashini bakoresha."

Akomeza agira ati "Abafite imashini eshatu bazisoreraga ibihumbi 50 abagejeje kuri esheshatu bagasora ibihumbi 100, uwo musoro twawukuyeho ariko bazajya basora kubyo bamaze gutunganya nko ku itafari rigiye ku isoko rizajya risorerwa amafaranga abiri hakubwe ingano y’amatafari."

Mu Karere ka Musanze haboneka inganda zirenga 10 zitunganya amabuye y’amakoro akorwamo amatafari y’ubwubatsi, umusenyi, garaviye, amapave n’ibindi.

Imashini zifashishwa mu guconga amakoro bakayakuramo amatafari
Abongerera agaciro amakaro basabye ko badohorerwa ku misoro
Amwe mu matafari akorwa mu makoro akifashishwa mu kubaka inzu n'imihanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .