Kigali Farms Ltd ikora ubuhinzi bw’ibihumyo mu nzu hifashishijwe ikoranabuhanga rihambaye rituma uru ruganda rusarura toni imwe ishobora kuvamo amafaranga miliyoni 10 buri cyumweru. Hafungwa garama 250 zigurishwa amafaranga 2500 ku bihumyo by’umweru na 2900 ku bihumyo bisa nk’itaka (brown), ni ukuvuga ko ikilo kigura agera ku bihumbi 10.

Uru ruganda ruherereye mu Karere ka Musanze, Umurenge wa Gacaca, Akagari ka Kabirizi, Umudugudu wa Mata, rukoresha umuriro w’amashanyarazi mu bikorwa byose uhereye ku gukora ifumbire, ubuhinzi bukorerwa mu byumba bigenerwa ubushyuhe bukenewe mu bihumyo ukageza ku bikonjesha bibikwamo umusaruro mbere y’uko ugezwa ku masoko yo mu gihugu no hanze.

Umuyobozi wa Kigali Farms i Musanze, Niyomugabo Samuel,yabwiye IGIHE ko uru ruganda rwatangiye imirimo yarwo muri Nyakanga 2016 rugashyira ku isoko umusaruro wa mbere muri Nzeri aho rwawugurishaga i Kigali mbere yo kwagurira isoko muri Kenya na Uganda.

Bitandukanye n’zindi nganda zisanzwe zigira igihe cyo guhagarika ibikorwa bigatuma umuriro bakoresha ugabanyuka, Kigali Farms ntishobora guhagarara gukoresha umuriro kuko ibihumyo bihingwa mu byumba bigenda bihindagurirwa ibipimo by’ubushyuhe bitewe n’ubukenewe.

Niyomugabo avuga ko batangiye kubaka uruganda mu 2013 ariko bagatangira gukora ari uko babonye umuriro muri Nyakanga 2016. Uruganda rwiguriye imashini iringaniza umuriro (transformer) naho umuriro bawugezwaho na leta.

Ati “Twatangiye umuriro uhenze cyane tukishyura amafaranga akabakaba miliyoni eshatu ku kwezi, wasangaga utwara hafi 50% y’ikiguzi cy’ibyo dushora, ariko aho leta igabanyirije ibiciro by’umuriro, ubu twishyura miliyoni imwe. Ibikorwa byacu byose bikenera umuriro guhera dukora ifumbire kugeza twohereje umusaruro ku isoko.”

Binyuze mu guhindagura ibipimo by’ubushyuhe bwo mu byumba bahingamo, uruganda rugena igihe ibihumyo bizerera bitewe n’isoko bafite kandi bakabika umusaruro muri firigo iminsi 15 bikimeze nk’aho ari bwo bigisarurwa.

Kuri ubu umurama w’ibi bihumyo uruganda ruwukura muri Afurika y’Epfo ariko rurateganya kujya ruwukorera i Musanze ndetse rukawugurisha n’abazawukenera mu Rwanda no hanze. Uruganda rutanga uyu murama nta handi ruri muri Afurika yo munsi y’Ubutayu bwa Sahara keretse muri Afurika y’Epfo.

Kigali Farms irateganya kongera umusaruro ukava kuri toni imwe zikagera kuri eshanu ndetse ikagurira isoko muri Afurika y’Iburengerazuba ari na ko igabanya igiciro cy’ibi bihumyo. Uru ruganda rw’i Musanze rufite abakozi bahoraho umunani n’abandi bagera kuri 30 bakora bubyizi.

Kigali Farms yatangijwe n’umushoramari w’Umubiligi, Laurent Demuynck, mu 2010. Yatangiye ihinga ibihumyo byitwa ‘oyster mushrooms’ mu Karere ka Gicumbi, inafasha abaturage ibaha umurama wabyo ikanabagurira umusaruro by’umwihariko mu turere twa Musanze na Burera aho ikorana n’abahinzi 1260 bibumbiye mu matsinda 78.

Oyster mushrooms ni byo bihumyo biboneka cyane ku masoko kandi bikanahenduka kuko n’umuntu wese yabihinga. Ikilo cyabyo kigura amafaranga 1500 mu Mujyi wa Kigali.