Saa tatu kuri uyu wa Gatatu nibwo uwari Visi Meya w'Akarere ka Musanze wungirije ushinzwe ubukungu, Ndabereye Augustin, yagejejwe imbere y'Urukiko Rwisumbuye rwa Musanze mu kuburana mu mizi ku byaha aregwa.

Ubwo Perezida w'iburanisha yabazaga Ndabereye niba yemera ibyaha akurikiranyweho, yasubije ko atiteguye kuburana, atanga impamvu z’uko yajuriye icyemezo yafatiwe n'urukiko rw'ibanze rwa Musanze cyo kuburana afunzwe, bityo ko kuburana mu mizi byasubikwa mu gihe ategereje icyemezo kizafatwa ku bujurire bwe ku ifungwa n'ifungurwa.

Tariki ya 21 Mutarama 2020 nibwo Urukiko Rwisumbuye rwari rwafashe icyemezo cyajuririwe na Ndabereye ku ifungwa n'ifungurwa ry'agateganyo, rutegeka ko azaburanishwa afunzwe, urubanza rwe mu mizi rushyirwa kuri uyu wa 29 Mutarama 2020.

Ubushinjacyaha bumaze kumva icyifuzo cya Ndabereye cyo gusubika urubanza bitewe n'uko atiteguye kuburana, bwasobanuye ko izi ari impamvu zo gutinza urubanza kuko yamenyeshejwe hakiri kare iby'uru rubanza bityo yakabaye yarabonye umwanya wo kwiga urubanza neza.

Urukiko rumaze kumva ibisobanuro by'impande zombi, rwafashe umwanzuro wo kwiherera ngo rusuzume neza ubusabe bwa Ndabereye n'ibisobanuro byatanzwe n'ubushinjacyaha bwateshaga agaciro icyifuzo cye.

Ku isaha ya Saa tatu na 47, abacamanza bagarutse mu cyumba cy'iburanisha, bagaragaza ko impamvu Ndabereye yatanze zirimo kuba atiteguye kuburana kuko atabonye umwanya uhagije wo kwiga urubanza no kuba yabanza gutegereza icyemezo kizafatwa ku bujurire bwe ku ifungwa n'ifungurwa, rwagaragaje ko impamvu yatanze zitabuza urubanza gukomeza mu mizi, bityo ziteshwa agaciro.

Nyuma urukiko rwasabye Ndabereye gukomeza kwiregura ku byaha aregwa akomeza kubazwa niba abyemera, we n'umwunganira mu mategeko bahita basaba urukiko ko urubanza rwaburanishwa mu muhezo kugira ngo abashe kwisanzura ndetse ngo bibe bitabangamira umuco mbonezabupfura n'umutekano w'urugo rwe.

Ubushinjacyaha bwasobanuye ko impamvu zirimo gutangwa na Ndabereye n'umwunganira ari ugutinza urubanza, kuko ngo muri Dosiye y'ibyo aregwa ntaho yigeze agaragaza impamvu zihariye zatuma aburanira mu muhezo, kndi ngo no mu rubanza rwe rwa mbere iyi mpamvu yarayitanze ariko ntiyayibonera ibisobanuro bihagije.

Umwunganizi wa Ndabereye yakomeje asobanura ko ibyo umukiliya we yasabye abyemererwa n'amategeko bityo asaba urukiko ko rutatesha agaciro impamvu yatanze, kuko ngo mu kwiregura mu mizi hari byinshi azagaragaza bishobora kuba byihishe inyuma y'ibyo yakoze ndetse hari n'amazina ashobora kugarukwaho y'ababyihishe inyuma bishobora kumufasha mu rubanza rwe, ngo n'ubwo bitari muri dosiye ye bishobora kwifashishwa.

Urukiko rwaje gufata umwanzuro wo kuburanisha Ndabereye mu muhezo kugira ngo bitabangamira imyitwarire mbonezabupfura nk'uko bigenwa n’amategeko.

Uru rubanza rwari rwitabiriwe n'abantu batari bake barimo na Ingabire Marie Immaculé ukuriiye Umuryango urwanya ruswa n'akarengane.

Ndabereye Augustin yatawe muri yombi mu gitondo cyo kuwa 30 Kanama 2019.