Akarere ka Ngoma katangijwemo ku mugaragaro gahunda y’ibiganiro by’amatsinda bikorwa mu gihe cy’ibyumweru 15 hagamijwe gukemura amakimbirane no kubanisha neza abaturage.

Iyi gahunda yatangijwe tariki ya 15 Ukuboza 2014, ngo ni uburyo bwo kugirana ibiganiro bihoraho mu matsinda atsura umuryango mwiza, bwitwa “Socialtherapy” cyangwa “Mvura Nkuvure” bishyizwe mu rurimi rw’Ikinyarwanda.

Muri Ngoma iyi gahunda yatangirijwe mu Murenge wa Rukira mu rwego rwo gukemura ibibazo by’amakimbirane abaturage ubwabo aribo babigizemo uruhare.

Jules Gahamanyi, umuyobozi w’umuryango ARAMA (Association for Research and Assistance Mission for Africa) avuga ko mu mishinga bakora yo gufasha abahuye n’ihohoterwa rikorerwa mu miryango babonye ko ubu buryo bwakiza ibikomere bikiri ku mitima ya bamwe.

Yagize ati “Nta majyambere buriya yabaho imitima idatuje. Abantu dukorana nabo bagize ingaruka zikomeye z’ubuzima bwo mu mutwe n’ubwo ku mubiri, baracyafite ibikomere byatewe na Jenoside yakorewe Abatutsi kugeza uyu munsi batarakira bagihanganye n’ingaruka; uburyo bwa Mvura Nkuvure bufasha abaturage kuganira bisanzuye ibibazo byabo bakabona umuti wabyo”.

Ku ruhande rw’ubuyobozi bw’Akarere, Nambaje Aphrodice, avuga ko ubu buryo bufatanywa na gahunda zo kuremera abaturage amatsinda bagaterwa inkunga z’amafaranga bagatangira imishinga iciriritse bagatangira gutera imbere.

Agira ati “Twabashyiriyeho imishinga inyuranye yo kwiteza imbere, Mvura Nkuvure rero ni umuti mushya twungutse wo guhuriza abantu hamwe bakabwirana ubuhamya bakagarura icyizere bagacya ku maso bakagira ibyiringiro ubuzima bwabo bugahinduka bwiza.”

Mu gutangiza iyi gahunda, hanatashywe ikigo gifasha abahuye n’ibibazo by’ihohoterwa n’abagikeneye ubuvuzi bw’indwara zishamikiye ku ngaruka za Jenoside yakorewe Abatutsi mu 1994.

Sosiyoterapi ikorerwa mu matsinda agizwe n’abantu hagati ya 10-15 ayobowe n’abafashamyumvire babihuguriwe umwe akayobora undi akandika ibibera muri iryo tsinda, bakemura ibibazo binyuze mu biganiro.

Ubu buryo bwo kuvurana aho dutuye, ngo bwagiye bukoreshwa no mu bihugu bikomeye ku Isi. Mu Bwongereza ubu buryo bwarifashishijwe cyane nyuma y’intambara ya kabiri y’isi yose, bwakoreshwaga mu kwita ku basirikari bari bafite ibikomere n’ibibazo byo mu mutwe byatewe n’iyo ntambara.

Sosiyoterapi kandi ikoreshwa nka bumwe mu buryo bwo kwita ku bafite ibibazo byo mu mutwe mu gihugu cy’u Buholandi.

Mu Rwanda bwatangijwe mu 2005 buzanywe n’abashakashatsi bo muri Kaminuza ya Amsterdam yo mu gihugu cy’u Buhorandi.

Bwatangirijwe muri Diyosezi Angilikani ya Byumba, bukoreshwa ngo himakazwe Ubumwe n’Ubwiyunge ndetse n’isanamitima mu baturage. Nyuma bwaje kandi gukoreshwa no mu karere ka Bugesera nanone mu bijyanye n’ubumwe n’ubwiyunge.

[email protected]