Umushumba wa Kiliziya Gatolika Papa Francis yaraye ahamagaje telefoni impunzi z’Abanya-Irak arazihumuriza azisaba kwihangana no kwibuka ko azizirikana.

Inkuru ya BBC ivuga ko ubu butumwa bwagenewe abahunze abarwanyi b’umutwe wa Leta ya Kiyisilamu, n’ahandi hari intambara n’imidugararo ku Isi, mbere y’uko asoma Misa yo mu ijoro rya Noheli.

Mu ijambo rye nyirizina ryo guha umugisha isi ku munsi mukuru wa Noheli rizwi nka Urbi et Orbi, Papa Francis, yagarutse ku bitero bya leta ya Kiyisilamu, byatumye abakiristu babarirwa mu bihumbi n’abandi baturage batari Abayisilamu bava mu byabo muri Irak no muri Syria.

Yasabye ko hakorwa ibishoboka byose izi ntambara zigahosha abaturage bakareka bagasubira mu byabo bakabaho mu mahoro azira intambara.

Umushumba wa Kiliziya kandi yanasabye ko amahoro mu Burasirazuba bwo hagati yabungwabungwa ku buryo bufatika, ndetse anasaba ko haba ibiganiro bigamije amahoro arambye hagati y’abashyamiraniye muri Ukraine. Yasabye ko impande zishyamiranye muri Nigeria zakumvikana, ibibazo biri hagati ya leta na Boko Haram bikabonerwa umuti urambye.