Nsabimana ’Sankara’ yongeye gusaba imbabazi, avuga ko yinjiye mu mitwe y’iterabwoba ashutswe

Yanditswe na Prudence Kwizera
Kuya 13 Nyakanga 2020 saa 02:21
Yasuwe :
0 0

Nsabimana Callixte wiyise Sankara wari Umuvugizi w’Umutwe wa FLN, yabwiye urukiko ko asaba imbabazi ku byaha yakoze, avuga ko yagiye muri ibyo bikorwa ashutswe, yifashisha umugani ko ubundi ’ihene mbi ntawe uyizirikaho inziza’.

Kuri uyu wa Mbere, Nsabimana yari imbere y’Urukiko Rukuru mu rugereko rwihariye ruburanisha ibyaha mpuzamahanga n’ibyambukiranya imipaka ruherereye mu Karere ka Nyanza, ngo yiregure ku byaha aregwa, ahanini bigaruka ku bitero umutwe wa FLN wagiye ugaba mu bice byegereye Ishyamba rya Nyungwe, byishe abaturage, abandi bagakomereka, bakanasahurwa imitungo yabo.

Iburanisha ryabaye hifashishijwe uburyo bw’iyakure buhuza impande ziburana hifashishijwe amashusho mu kwirinda icyorezo COVID-19. Abacamanza batatu n’umwanditsi bari mu cyumba cy’urukiko i Nyanza, Nsabimana Callixte ari muri Gereza ya Mageragere i Kigali hamwe n’umwavoka we.

Yatangiye yisobanura ku cyaha cyo ‘kurema umutwe w’ingabo utemewe’, avuga ko acyemera akanagisabira imbabazi. Yavuze ko tariki ya 15 Nyakanga 2018 ari bwo yinjiye mu Mutwe wa FLN, awubera umuvugizi ariko atagize uruhare mu kuwushinga.

Yasobanuye ko kuri iki cyaha hari aho Ubushinjacyaha bwagiye bwibeshya ku mateka ye, nk’aho bwavuze ko igihe yari umunyeshuri muri Kaminuza Nkuru y’u Rwanda yari icyigomeke, agumura abandi banyeshuri akaza no kwirukanwa.

Yavuze ko amaze kwirukanwa muri Kaminuza Nkuru y’u Rwanda (UNR), yagannye inzego zitandukanye ziramurenganura, zitegeka ko asubira kwiga ariko babyumvikanaho n’abayobozi ba NUR ko azahabwa ibizamini akazajya mu birori byo gusoza amasomo (graduation) nk’abandi, kandi byarakozwe.

Ku byavugwaga ko yatangiye kurwanya Leta akiga muri UNR, yavuze ko atari byo kuko ‘yagiranye ikibazo n’abantu ku giti cyabo’ kandi icyo gihe inzego za Leta y’u Rwanda ari zo zamurenganuye.

Yavuze ko mu 2013 ubwo yabaga muri Tanzania aribwo yavuganye n’umuntu wabaga muri Afurika y’Epfo, amubaza niba yahakomereza amashuri, amwizeza ko azabimufashamo bituma ajyayo. Yasanze abamwakiriye baba mu Mutwe wa RNC ya Kayumba Nyamwasa, baramuganiriza, bamusaba kujya muri uwo mutwe.

Nyuma ngo bamujyanye kubonana na Nyamwasa baraganira, amubwira imigambi afite yo guhirika ubutegetsi bw’u Rwanda, amusaba kujya kuri Radio Itahuka bagafatanya iyamamazamatwara. Nyuma ngo yabonanye na Patrick Karegeya na we bagirana ibiganiro bigamije guhirika ubutegetsi buriho mu Rwanda.

Yabwiye urukiko ko abantu bo muri RNC bamugaragarije ingingo nyinshi zigaragaza Leta y’u Rwanda nabi, bituma ashyuha mu mutwe yiyemeza gufatanya nabo.

Uyoboye iburanisha yamubajije impamvu yemeye gushukwa kandi ari umuntu warangije Kaminuza azi ubwenge, asubiza yifashishije umugani ko ‘ihene mbi ntawe uyizirikaho inziza’, yemera ko yashutswe bitewe n’abo yaganiriye nabo bari bakomeye barimo Kayumba Nyamwasa na Patrick Karegeya, bamwemeje arayoboka.

Nsabimana yaje kuva muri RNC, ajya gushinga no kuyobora Ishyaka ryitwa Rwandese Revolutionary Movement, RRM. Ryaje kwihuza na PDR Ihumure na CNRD Ubwiyunge, bashinga Ihuriro MRCD riyobowe na Paul Rusesabagina, Nsabimana Callixte aba Visi Perezida wa Kabiri, banashinga Umutwe bise FLN, awubera umuvugizi.

Ku byo ashinjwa byo gushakira abarwanyi ba FLN ibikoresho n’inkunga, yemeye ibyo aregwa, avuga ko yabikoze ajya kuri radio agasaba abantu gutera inkunga uwo mutwe. Yasobanuye ariko ko nta mbunda cyangwa amasasu yaguze ngo aboherereze ku rugamba.

Ati “Nta muntu n’umwe wigeze ancishaho n’igiceri cy’atanu ngo noherereze bariya bantu.”

Ku kijyanye no kwinjira muri FLN kandi azi ko ari umutwe w’iterabwoba, yavuze ko atari ko bawitaga kuko bawitaga ‘umutwe ugamije guhirika ubutegetsi bw’u Rwanda.’

Ku bijyanye n’ibitero byagabwe na FLN muri Nyaruguru na Nyamagabe mu Majyepfo y’u Rwanda mu myaka ishize, yemeye ko yabigizemo uruhare ndetse akagisabira imbabazi’.

Yavuze ko uruhare yemera muri ibyo bitero byose ari ubukangurambaga bwo gusaba abantu gushyigikira ibyo bitero no gusaba Abanyarwanda kwivumbagatanya.

Ati “Urwo ni uruhare rukomeye nagize Nyakubahwa Perezida w’Urukiko.”

Yavuze ko ibitero byabaye byose ari mu gihugu cya Comores ariko yahabwaga amakuru n’abayoboye imirwano agakora ubukangurambaga mu binyamakuru n’ahandi.

Icyaha cyo gutanga amabwiriza ku gikorwa cy’iterabwoba yacyemeye avuga ko ntaho yahera agihakana kuko yari umwe mu bayobozi bakuru ba MRCD. Gusa yavuze ko atatangaga amabwiriza ya gisirikare ahubwo yayatangaga mu rwego rwa politiki cyane cyane ajyanye no gukora ubukangurambaga.

Yasobanuye ko bari barumvikanye n’abayoboye abarwanyi ko bazajya bagaba ibitero, ariko batabahaga amabwiriza y’uko babigaba n’aho batera; bisobanuye ko kugaba ibitero byakorwaga n’abakuriye abarwanyi bayobowe na Habimana Hamada.

Ati “Twebwe twatangaga amabwiriza ya politiki, igisirikare kigakora ibyacyo.”

Icyaha cyo kugira uruhare mu bikorwa by’iterabwoba yacyemeye avuga ko harimo uruhare rwe n’ubwo bitandukanye n’uko Ubushinjacyaha bubisobanura.

Yemeye ko yinjiye muri uwo mutwe tariki ya 15 Nyakanga 2018, bityo avuga ko abyemera akabyicuza akanabisabira imbabazi. Yemeye kandi icyaha cyo gukora ibikorwa by’iterabwoba no kugambana no gushishikariza gukora iterabwoba, bityo akaba abisabira imbabazi.

Yemeje ko yagiye akorana n’abantu batandukanye ndetse na Leta z’amahanga zirimo igihugu cya Uganda, bagamije guhirika ubutegetsi bw’u Rwanda. Gusa yavuze ko ari bwo bari bagitangira kuvugana na Uganda, ariko mu byo bemeranyije nta na kimwe cyari cyarashyizwe mu bikorwa.

Yavuze ko amafaranga FLN yahereyeho igaba igitero yari yatanzwe na Perezida wa Zambia, Edgar Lungu.

Yanemeye kandi icyaha cyo kuba icyitso cy’abateye bakica no gufata abantu bugwate, kuko abarwanyi ba FLN yavugiraga bafashe bugwate abaturage mu bitero bagabye i Nyaruguru, ariko avuga ko atigeze abyigamba nk’uko Ubushinjacyaha bubivuga.

Yakomeje avuga ko n’ubwo atari ahibereye, ariko ari ingaruka z’umurongo bari baratanze wo gushoza intambara ku Rwanda.

Ati “Uruhare nemera ni uko ari ingabo zacu zabikoze.”

Icyaha cyo gukwiza amakuru atariyo n’icengezamatwara rigamije kwangisha Leta y’u Rwanda mu mahanga, yavuze ko iki acyemera atazuyaje.

Ati “Kuri iki cyo ndi ruharwa, nabikoze imyaka itandatu kuri Radio Inyenyeri n’ibindi binyamakuru. Nabikoze imyaka itandatu.”

Kuri iki cyaha yasabye imbabazi Abanyarwanda, Perezida wa Repubulika n’urukiko.

Iburanisha ryasubitswe saa 12h38, urukiko ruvuga ko ibyuma by’ikoranabuhanga ruri gukoresha bigiye gukoreshwa mu rundi rubanza, bityo Sankara azakomeza kwiregura tariki ya 10 Nzeri 2020, ahereye ku cyaha cyo guhakana Jenoside.

Nsabimana Callixte 'Sankara' wari Umuvugizi w’Umutwe wa FLN yavuze ko yagiye mu bikorwa byo kurwanya u Rwanda ashutswe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .