Kuri uyu wa Gatanu tariki 1 Gashyantare 2019, umunsi abanyarwanda bazirikanamo ibikorwa by’Intwari z’u Rwanda, hakinwe imikino ya nyuma y’igikombe cy’Intwari cyateguwe n’Urwego rw’Igihugu rushinzwe Intwari z’Igihugu, Imidari n’Impeta by’Ishimwe (CHENO) ku bufatanye na Ferwafa.
APR FC yakinnye na Rayon Sports ibura kapiteni wayo Mugiraneza Jean Baptiste Migi na Sugira Ernest bavunitse, naho Rayon Sports yo yaburaga Fabrice Mugheni na Eric Irambona bavunitse na Manishimwe Djabel uri mu kiruhuko nyuma yo kurushinga.
Uyu mukino wayobowe na Samuel Uwikunda afatanyije na Bwiriza Nonati Raymond na Hakizimana Ambroise ku mpande naho umusifuzi wa kane yari Abdul Karim Twagirumukiza.
Ikipe ya Jimmy Mulisa yatangiye umukino igaragaza urwego rwo hejuru, ihererekanya neza kurusha Rayon Sports byanayihesheje igitego hakiri kare.
Ku munota wa 29 gusa, ku makosa ya Rutanga Eric watakaje umupira hafi y’izamu, wafashwe na Issa Bigirimana awohereza mu rubuga rw’amahina uhura na Nshuti Dominique Savio afungura amazamu ariko ntiyishimira iki gitego nk’uko bisanzwe, kubera guha icyubahiro ikipe yamumenyekanishije.
Mu minota yakurikiyeho ikipe ya Rayon Sports yihariye umukino inahusha uburyo bwinshi bwashoboraga kubyara ibitego, nko ku munota wa nyuma w’igice cya mbere rutahizamu wayo Michael Sarpong yasigaranye n’umunyezamu Kimenyi Yves ariko ishoti yateye rigarurwa n’umutambiko, bituma igice cya mbere kirangira APR FC iri imbere.
Igice cya kabiri kigitangira Jimmy Mulisa yakoze impinduka zihuse akuramo Michel Rusheshangoga wavunitse asimburwa na Songayingabo Shaffy, naho Mugunga Yves utigaragaje cyane muri uyu mukino asimbuzwa Evode Ntwari.
Izi mpinduka zatumye Rayon Sports idakomeza kuyisatira cyane ahubwo APR FC ishaka igitego cya kabiri, ariko amahirwe ntiyayihira ku munota wa 62 ku ikosa ryakorewe Muhadjiri Hakizimana haboneka ‘coup franc’, ayiterera neza ariko umupira ugarurwa n’igiti cy’izamu. Benshi baketse ko umupira wageze mu izamu ariko umusifuzi Uwikunda ntiyabyemeza.
Roberto Oliveira Goncalves do Carmo utoza Rayon Sports yakoze impinduka yinjiza Ndayisenga Kevin na Bukuru Christopher, ariko ntibyagira icyo bihindura umukino urangira APR FC itahanye intsinzi y’igitego 1-0.
Iyi ntsinzi yahise iyihesha igikombe cy’Intwari kuko yujuje amanota atandatu, ikurikirwa na AS Kigali n’amanota atanu, Rayon Sports iba iya gatatu n’amanota ane naho Etincelles FC isoreza ku mwanya wa nyuma n’inota rimwe.
Amafoto: Ntare Julius
Ibitekerezo 0