Dr Ngirente yabitangaje kuri uyu wa Kabiri tariki 4 Nyakanga 2023 ubwo yifatanyaga n’abatuye Akarere ka Rubavu kwizihiza imyaka 29 ishize u Rwanda rwibohoye.

Ni na bwo hatashywe umudugudu w’icyitegererezo wa Rugerero watujwemo imiryango 142 yiganjemo abatishoboye babaga mu manegeka ndetse n’abandi batari bafite aho baba.

Minisitiri w’Intebe yafashe mu mugongo abaturage ba Rubavu bagizweho ingaruka n’ibiza byibasiye Intara y’Iburengerazuba n’Amajyaruguru muri Gicurasi uyu mwaka, bigahitana ubuzima bw’abasaga 130.

Ati "Muharanire gukomeza kwiyubaka, Guverinoma y’u Rwanda izakomeza kubaba hafi kugira ngo mukomeze guhangana n’ingaruka."

Yavuze ko kuri uyu munsi wo kwibohora, Abanyarwanda bakwiriye guharanira iterambere kuko ari cyo gisobanuro cyo kwigira.

Ati "Ntabwo wakwibohora usabiriza, kwibohora harimo urugendo rwo kugenda twigira nk’igihugu. Ni yo mpamvu buri mwaka umunsi nk’uyu duteranira hamwe tukizihiza ibyo igihugu cyacu cyagezeho mu kwiteza imbere."

Ibyo yavuze ko bizajyana no gufata neza ibikorwaremezo byubakirwa abaturage kandi bikabyazwa umusaruro.

Ati "Mboneyeho gusaba abatujwe mu mudugudu w’icyitegererezo wa Rugerero gufata neza iyi mpano y’Umukuru w’Igihugu amazu duhabwa tukayafata neza ntituyagurishe kandi ntituyasenye ahubwo akatubeshaho neza n’imiryango yacu".

Yakomeje agira ati "Ibikorwa byatashywe uyu munsi twiyemeze kubifata neza, niba ari umuhanda wubatswe tuwurinde icyawangiza cyose, niba ari ivuriro, ibitaro tubirinde, ishuri twoherezemo abana."

Minisitiri w’Ubutegetsi bw’Igihugu, Musabyimana Jean Claude yasabye ubuyobozi bw’inzego z’ibanze guteganya ingengo y’imari yunganira abaturage mu gufata neza ibikorwaremezo bubakirwa, kugira ngo bitange umusaruro biba byitezweho byubakwa.

Musabyemariya Christine watujwe mu mudugudu w’icyitegererezo wa Rugerero, yashimye ko yakuwe mu bukode we n’umuryango we, akaba yizeye ko ubuzima bwabo bugiye guhinduka.

Ati "Nabagaho mu buzima bukomeye bwo gukodesha nabwo bingoye ariko ndashimira Perezida wa Repubulika wadutekerejeho akaduha aho kuba. Inzu yaduhaye ni nziza irimo ubwogero, ubwiherero bicaraho, televiziyo, ibitanda bitatu na gaz."

"Ubuzima buzashoboka cyane kuko nka ya mafaranga nakodeshagamo hazajya habonekamo ibyo kurya n’ubundi buryo bwo kwizigama."

Ibikorwaremezo bijyanye n’umunsi wo kwibohora byatashywe hirya no hino mu gihugu byatwaye miliyari zisaga 122 Frw, bikaba birimo imidugudu yo guturamo, imihanda, ibiraro, amavuriro n’ibindi.

Minisitiri w'Intebe yasabye abaturage gukora cyane kuko kwibohora bijyana no kwigira

Minisitiri w'Intebe Ngirente (ibumoso) na Minisitiri w'Ingabo, Marizamunda Juvenal bashimira itorero ryari rimaze gususurutsa abitabiriye

Minisitiri w'Ingabo, Marizamunda Juvenal akurikiranye uyu muhango

Abanyamadini n'abandi bayobozi bitabiriye uyu muhango

Minisitiri Musabyimana yasabye abayobozi gufasha abaturage kwita ku bikorwa remezo bahawe

Abatuye i Rubavu bashimye uburyo bafite umutekano

Minisitiri w'Ubutegetsi bw'Igihugu, Musabyimana Jean Claude ni umwe mu bayobozi bari bitabiriye

Nyirahabimana Liberata yatanze ubuhamya bw'uburyo yiteje imbere abifashijwemo n'ubuyobozi

Umuhanzi Senderi International Hit yasusurukije abitabiriye

Itorero La Jeunesse Nouvelle risusurutsa abitabiriye uyu muhango

Aha Minisitiri w'Intebe yasobanurirwaga iby'izi mboga zahinzwe n'abaturage bo mu Mudugudu wa Rugerero

Aka gakiriro kubatswe mu Mudugudu wa Rugerero kitezweho kuba isoko y'umurimo ku rubyiruko

Mu mudugudu wa Rugerero hateganyijwe hegitari zisaga enye zo guhingaho imboga n'imbuto

Umudugudu wa Rugerero utuwe n'imiryango 142 yahoze ituye nabi

Uyu mudugudu wubatswe mu murenge wa Rugerero mu karere ka Rubavu

Minisitiri w'Intebe yasabye ko izi nkoko zitabwaho zigafasha abaturage kurwanya imirire mibi no kwikenura

Minisitiri w'Intebe, Dr Ngirente yasuye abakorera mu gakiriro kubatswe mu Mudugudu wa Rugerero

Minisitiri ushinzwe ibikorwa by'ubutabazi, Madamu Kayisire Solange yifatanyije n'abanya-Rubavu kwizihiza umunsi wo Kwibohora

Ibyishimo byari byose kuri aba baturage

Bamwe mu rubyiruko rwatujwe mu mudugudu wa Rugerero batangiye kwihangira umurimo, bakora inkweto

Akanyamuneza kari kose ku batuye Rubavu ubwo bizihizaga imyaka 29 u Rwanda rumaze rubohowe

Buri nzu yatanzwe irimo ubwiherero bwa kijyambere

Aha Minisitiri w'Intebe yaganiraga n'umwe mu barezi bigisha abana bo mu Irerero

Inzu zahawe abaturage zirimo ibikoresho by'ingenzi nk'ibitanda

Inzu zatanzwe harimo izifite ibyumba bibiri n'uruganiriro n'izifite icyumba kimwe n'uruganiriro, hakiyongeraho igikoni n'ubwiherero

Irerero ryubatswe muri uyu mudugudu rifite ubushobozi bwo kwakira abana 150

Izi nkoko ni iza koperative y'abatujwe mu mudugudu wa Rugerero

Minisitiri w'Intebe Dr Ngirente n'abandi bayobozi basuye irerero ryubatswe muri uyu mudugudu

Visi Perezida wa Sena, Nyirasafari Esperance ni umwe mu bayobozi bitabiriye

Umuvugizi w'Ingabo z'u Rwanda, Brig Gen Ronald Rwivanga yitabiriye ibirori byo kwizihiza Kwibohora ku nshuro ya 29

Ubwo Minisitiri w'Intebe Dr Ngirente yatemberezwaga ibikorwa bitandukanye byubatse mu mudugudu wa Rugerero

Amafoto: Darcy Igirubuntu

Video : Sage Igena