Akarere ka Nyabihu na Musanze ni tumwe mu turere mu minsi yashize twibasiwe n’ibiza ahanini biterwa n’imihindagurikire y’ikirere akaba ari muri urwo rwego hafashwe ingamba zo guhangana nabyo.

Nk’uko byasobanuwe na Muhawenimana Abed Cherif, Umukozi w’umushinga “RV3CBA” uzafasha mu guhangana n’izi ngaruka, ubwo hasozwaga amahugurwa yari agenewe abafatanyabikorwa b’uyu mushinga uzakorera mu mirenge y’Akarere ka Nyabihu n’Umurenge wa Busogo ho muri Musanze, ngo ku ikubitiro babanje gukarishya ubwenge bw’abazabafasha mu gushyira mu bikorwa uyu mushinga witezweho kuzakemura ikibazo cy’ibiza, gutuza neza abari mu manegeka no kwigisha abaturage bo muri aka gace indi mirimo itari ubuhinzi.

RV3CBA ni umushinga ubarizwa muri Minisiteri ifite kurwanya ibiza mu nshingano zayo (MINIRENA) ugamije guhangana n’ibiza n’imihindagurikire y’ikirere hashingiwe ku ruhare rw’abaturage.

Asoza aya mahugurwa, Umuyobozi Wungirije Ushinzwe Ubukungu mu Karere ka Nyabihu, Angele Mukaminani, yashimye uburyo Umushinga wahisemo guhugura abahagarariye abandi n’abakangurambaga b’umushinga mu mirenge kuko bituma abaturage bagira umushinga uwabo. Yashimye kandi uburyo amahugurwa yatanzwe neza, asaba abahuguwe kuba intangarugero mu gushyira mu bikorwa gahunda y’uyu mushinga aho batuye.

Minisitiri Kamanzi Stanislas atangiza umushinga muri Kamena

Yagize ati ”Ubwitange mwagaragaje muri aya mahugurwa muzabukomeze no mu kwihutisha gahunda y’ibikorwa by’uyu mushinga, mube umusemburo wo kwihutisha iterambere ry’aho mutuye muhangana n’ingaruka z’imihindagurikire y’ibihe kandi aya masomo mwabonye azababere impamba”.

Aya mahugurwa yitabiriwe n’abantu basaga 80 bari mu nzego zinyuranye zirimo Abahagarariye Inzego z’Urubyiruko, Inzego z’Abagore, Inzego z’Abafite ubumuga, Abagoronome, Abakuriye SACCO mu mirenge, abahagarariye amakoperative anyuranye mu Mirenge 7 ya Nyabihu n’Umurenge 1 wa Musanze (Busogo), uyu Mushinga ukoreramo.

Ibikorwa by’umushinga RV3CBA bizagera ku miryango 38,266 yo mu mirenge 7 y’Akarere ka Nyabihu ari yo Jomba, Karago, Kintobo, Mukamira, Rambura, Rurembo na Jenda, hakiyongeraho Umurenge wa Busogo wo mu Karere ka Musanze.

Uyu mushinga wa MINIRENA uterwa inkunga n’Ikigega cy’Umuryango w’Abibumbye cyita ku Bidukikije (UNFCCC), ugashyirwa mu bikorwa n’Ikigo cy’Igihugu cy’Umutungo Kamere (RNRA), uzamara igihe cy’imyaka ine (2014-2017).

[email protected]