Nyuma y’ibyumweru 46 abo basirikikare bazamara biga, bazanahabwa impamyabushobozi y’icyiciro cya gatatu cya Kaminuza mu by’umutekano (Masters in security package) n’ubumenyi bwisumbuye ku bya gisirikare.
Atangiza ku mugaragaro aya masomo kuri uyu mbere tariki 20 Nyakanga, Brig Gen. Charles Karamba yasabye abayitabiriye kumva ko amasomo bazahakura azagirira Afurika akamaro.
Yabasabye gushyira hamwe no kungurana ubumenyi butandukanye bagamije gukomeza kubungabunga amahoro.
Yagize ati: “Buri kintu gikenera ko hakomeza kubaho amahugurwa mu rwego rwo kurushaho kwizera ubusugire bwacyo, ni muri urwo rwego muri hano, mukwiye kubishyiraho umutima wose kugira ngo bizadufashe guhangana n’ibyahungabanya umutekano mu kinyejana cya 21’’.
Brig.Gen. Charles Karamba yabasabye kumva ko bari mu rugo bityo bakwiye guhuriza hamwe na nyuma y’amasomo bikazaborohera gukomeza guhanahana amakuru no kungurana ibitekerezo hagamijwe umutekano usesuye.
Abitabiriye amasomo bagaragaje ko u Rwanda ari igihugu cy’ikitegererezo ko gikwiye gukomeza kubera urugero rwiza Afurika cyane cyane ku buijyanye n’umutekano.
Major Lichard Chidzungu waturutse mu ngabo za Malawi, yagize ati “Bimaze kumenyekana ko u Rwanda ari igihugu gikwiye kwigirwaho cyane cyane ku bijyanye n’umutekano[...], kuza hano jyewe biranshimishije kuko ubusanzwe u Rwanda ndufata nk’igihugu cy’icyitegererezo ngendeye ku mateka yakiranze n’uburyo cyayigobotoye’’.
Lt. Col. James Kirumba, witabiriye amasomo aturutse muri Kenya yavuze ko bazungukiramo ibintu byinshi bazanasangiza abo basize iwabo.
Yongeye ho ko kuba amasomo bagiye kuyigira mu Rwanda ari akarusho, kuko rumaze kuba icyitegererezo mu bijyanye no kubungabunga amahoro.
Aya masomo yatangijwe ku nshuro ya kane kuva mu 2012, akaba agenewe abasirikare bakuru (Student Officers of the SCSC04) akabera mu kigo gikuru cya gisirikare cy’i Nyakinama ‘Rwanda Defence Force Command and Staff College’, mu gihe cy’umwaka.
TANGA IGITEKEREZO